Қызылшаға қарсы вакцина сатып алуға 4 млрд теңгеге жуық қаражат бөлінді

© Суретті түсірген Т. Құсайын

Қазіргі күрделі эпидемиологиялық жағдайға байланысты қызылша, қызамық және паротитке қарсы вакцинаның қосымша көлемі сатып алынды.

Қазақстан Республикасы Денсаулық сақтау министрлігі Санитарлық-эпидемиологиялық бақылау комитетінің Вакцинаны басқаратын жұқпалы ауруларды бақылау департаментінің басшысы Нұршай Әзімбаева емхана орнында вакциналардың бар-жоғы туралы сұраққа осылай деп жауап берді, деп хабарлайды mangystaumedia.kz сайты.

«Осы жұмыс аясында 1 млрд теңгеден астам қаражат бөлініп, облыстық денсаулық сақтау басқармаларынан үнемделген қаражат есебінен 500 мың доза сатып алынды. Сондай-ақ, Үкімет резервінен 3 миллиард теңгеден астам қаржы бөлініп, оған қызылша, қызамық және эпидемиялық паротитке қарсы біріктірілген вакцинаның 1 миллионға жуығы сатып алынды», - деді Нұршай Әзімбаева.

Оның айтуынша, осы айдың соңына дейін бұл вакцинаның 500 мың дозасы қабылданады деп жоспарланса, желтоқсан айында тағы 1 миллион доза қабылданып, барлық аймақтарға таратылады деп күтілуде.

Сондай-ақ сарапшы екпеден бас тартуға себеп - қазақстандықтардың қызылшаның нақты қауіпі туралы білмеуі, жеке немесе діни сенімі, теріс ақпаратқа сенуі екенін атап өтті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.