АИТВмен тіркелгендер азая түсті

Өткен жылы Маңғыстау облыстық ЖИТСке қарсы күрес және оның алдын алу жөніндегі орталығында АИТВ инфекциясымен 40 жағдай тіркелген. Оның ішінде 37 адам Қазақстан Республикасының азаматтарының арасынан, ал 3-і шетел азаматтары арасынан анықталды. 2019 жылы АИТВ инфекциясының 48 жағдайы анықталып, оның ішінде 42 жағдайы Қазақстан азаматтары арасында тіркелді. Екі жылдың қорытындысын салыстырғанда, 2020 жылы АИТВмен тіркелгендердің азайғаны байқалады.

- АИТВ инфекциясы Маңғыстау ауданынан басқа облыстағы барлық аудан-қалаларда тіркелді, - дейді орталықтың алдын алу және эпидемиологиялық қадағалау бөлімінің меңгерушісі Жамила Махамбетқалиева. - Яғни, тіркелген жағдайлардың 57 пайызы Ақтау қаласында анықталды. Қазіргі таңда АИТВ инфекциясымен өмір сүріп жатқан адамдарды қоғамда қабылдау осы кезге дейін біршама қиындықтар туғызып отыр. Қоғамда әлі кезге дейін аталған инфекция тек қана есірткі қолданушылар мен жеңіл жүрісті адамдардың арасында кезігеді деген жалған түсінік қалыптасқан және бұл пікір дұрыс емес.

Жамила Әбдіқадірқызының айтуынша, қазіргі кезде АИТВ инфекциясы бойынша жағдай өзгерді және бұл вирус қалыпты саналатын азаматтар, әсіресе жастар арасында да кездеседі. Оның ішінде 20-49 жас аралығында көбірек анықталып, барлық тіркелген жағдайлар 78,3 пайызына жетіп отыр.

Сондай-ақ АИТВ инфекциясы әйелдерге қарағанда, ер азаматтар арасында 2,7 есе жиі тіркеледі. Алғашқы тіркелу кезеңінде АИТВ инфекциясы жұмыссыздар арасында, яғни қоғамда белгілі орны жоқ адамдар арасында тіркелген болса, бүгінде 46 пайызы жұмыс жасайтын адамдар арасында да анықталып отыр. Қоғамдағы дені сау адамдар арасында тіркелгендіктен, негізі АИТВ инфекциясының берілу жолы—жыныстық қарым қатынас арқылы.

- АИТВ инфекциясы анықталған адамдармен тексерілуге дейінгі және тексерілуден кейінгі кеңестер беріліп, адамдарға құқығы мен міндеттері, алдын-алу туралы түсінік жұмыстары жүргізіліп, жақын қатынастағы адамдары тексерілді, - деді Ж.Махамбетқалиева. - АИТВ инфекциясы анықталған адамдар облыстық орталықта диспансерлік есепке алынып, тегін антиретровирустік ем қабылдауда. Қазақстан Республикасы АИТВ инфекциясы бойынша шоғырланған сатыда, яғни аталған дерт қадағалауда. Республикада АИТВ инфекциясына қарсы адамның ағзасында вирусты төмен деңгейде ұстап тұратын белсенді дәрі-дәрмектер бар. Алайда, бір өкініштісі—осы кезге дейін аталған инфекцияға қарсы вакциналар мен ағзада вирусты толықтай жоятын дәрі-дәрмектердің шығарылмауы. Қоғамда әр адам өзінің денсаулығына жауаппен қарап, АИТВ инфекциясы бойынша статусын білгені жөн. Ол үшін анонимді, құпия, ерікті, тегін тексерілуден өтуге болады. Тексерілу үшін тұрақты мекен-жайы бойынша тіркелген емханаға немесе Ақтау қаласындағы 3 шағын аудандағы 170 ғимаратта орналасқан облыстық ЖИТС орталығына келуге болады. АИТВ инфекциясы бойынша сұрақтар туындаған жағдайда 50-40-49 сенім телефонына хабарласуға мүмкіндік бар.

Валентина ҚОЗЫБАҚОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.