Түпқарағанда мемлекеттік ту салтанатпен көтерілді

Кеше Түпқараған ауданының Форт-Шевченко қаласындағы, жастардың орталық алаңында «Nur Otan» партиясының бастамасымен «Менің Туым – менің Отаным» атты республикалық патриоттық акция өтті. Аудан депутаттары, жастар мен мекеме басшыларының қатысуымен өткен акция мемлекеттік Туды салтанатты түрде көтеру рәсімімен басталды. - Іс­-шараның басты мақсаты – жастарды патриотизмге баулу, мемлекеттік Туды насихаттап, жастардың туған еліне деген отансүйгіш рухын ояту, ­- деді бұл акцияның ауданда ұйымдасты­рылуына атсалысқан «Нұр Отан» партиясы Түпқараған аудандық филиалы төрағасының бірінші орынбасары С.Жолдасова. Іс-­шараға қатысқан аудандық мәслихат хат­шысы А.Досанова: – Жер шары деген үлкен планетаның Каспий теңізі мен Алтайға дейінгі, Гималай таулары мен Солтүстік Қазақстандағы ормандарға дейінгі алқабын алып жатқан ұлан байтақ еліміз – біздің Отанымыз. Көк туымыз – елдігіміздің айғағы. Қазақстан бойынша өткізілген акция барысында бүгін орталық алаңда біз де Туымыз көпшілікке көрініп тұратындай етіп орнаттық. Түрлі халық­ аралық сайыстарға қатысып, жүлдемен келіп жүрген қазақстандықтар әлемге білімді, дарын­ды қазақ деген ел, Қазақстан деген мемлекет бар екенін көк туымызды жоғары сатыдан көр­сету арқылы танытып келеді. Ең үлкені – мұ­найдан бастап, ең қарапайымы – Қарағандының тігін фабрикасында өндіріліп жатқан шұлықта­рының ілеспе қағаздарының бетінде «Қа­зақстанда жасалды» деген көк тудың белгісін көргенде жүрегіміз жылып қоя береді. Осы ту желбірей түссе екен деп тілейміз, ­- деді.

Клара ҚАНСҰЛТАНОВА