Мақсат – ұлттық рухты нығайту

Иә, елдің ішкі-сыртқы шаруаларына араласып, бір әулет, бір ауылға сөзі өтіп тұрған ақсақалдан именіп, айтқанына тоқтаған халықпыз. Ақсақал десе, бітті, мәселе солай шешіледі. Жақында Маңғыстау ауданының орталығы Шетпе кентіндегі ардагерлер үйінде ауыл ақсақалдарымен кездесу өтті. Оны Маңғыстау аудандық ішкі саясат және тілдерді дамыту бөлімінің тапсырмасымен «Боевое братство» ауған соғысы ардагерлері қоғамдық бірлестігі ұйымдастырды. Бас қосу тақырыбы – «Діни экстремизм мен терроризмнің алдын алайық». Кездесуді «Боевое братство» қоғамдық бірлестігінің төрағасы Матжан Шаулиев ашып, жина­лыстың мақсатын түсіндірді. Матжан Рамазанұлы жобаның мақсаты – діни тұрақтылықты қамтамасыз ету, сондай-­ақ бұрмаланған діни көзқарастардың қалыптасуының алдын алу үшін Қазақстан мұсылмандары діни басқармасы мен Дін істері және азаматтық қоғам министр­лігінен біліктілігі жоғары, дінтанушы, теологтарды шақыру арқылы аудандағы бұрмаланған діни ағымдағы тұрғындар­дың дәстүрлі дінге деген оң көзқарасын ояту, оңалту, патриоттық сезімін нығайту екендігін айтты. Ал жат ағымдардың алдын алу және шынайы патриотизм­ді күшейте түсу үшін ұлттық рухты ны­ғайтуға бағытталған іс­-шаралар ұйым­дастырудың маңызы зор. Ардагерлер алдында сөйлеген «Нұр­ Мүбәрак» университетінің оқытушысы, сарапшы­теолог, исламтану магистрі, рес­публикалық ақпараттық насихат тобының мүшесі Рауан Чингужанов иманы берік, аузы дұғалы ақсақалдар балаларға қазақи тәрбиені дұрыс бере алса, жастардың жат ағымдар жетегінде кетпейтінін қаперге берді. – Жүрегінде иманы бар адамға керегі – намаз. Рух содан ләззаттанады екен, – деді ол. – Мәселен, біреудің көлігі бар делік, оны күнде жуады, бензинін құйып тұрады, жақсы күтім жасайды. Бірақ өзі аш, үсті-­басы кір­-кір болып жүре берсе, мұның жақсы емес екені барлығымызға да түсінікті. Сол сияқты, біздің де көп­шілігіміздің денемізді барынша күтіп, әдемілеп, семіртіп қойғанымызбен, рухы­мызға мән бере бермейтініміз өтірік емес. Ал сырты сұлу болып, бірақ рухы жұтаң адамда түрлі проблемалар пайда болып тұрады. Сондықтан мұсылман екеніміз­ді біліп, жұма сайын мешітке барып, уағыз тыңдап тұрсақ, иманымыз, рухы­мыз күшейеді. Ал дене мен рух күшейіп, біріккен кезде одан кәміл адам шығады, мықты ұрпақ пайда болады. Рухы күшті ақсақалдың айтқан сөздері рухы әлсіз кісінің айтқанынан мың есе әсерлі бо­лады. Өмірі даналыққа толы кемел ақ­сақалдардың ұрпаққа берері өте көп. Ұрпаққа өнеге болатын тұлға сіздерсіздер, қадірлі аталар. Жасыратыны жоқ, кейде үлкен аталардың немерелеріне «менің жа­сымда сөйтіп едім, бүйтіп едім» деп үлгі етуге тұрмайтын ұсақ-­түйектерді айтып, мақтанып жататыны бар. Ауыл  арасын­да өсек­-аяңды әңгіме қылып, аузы әзіл­қалжыңнан босамайтын қарттарды көріп жүрміз. Бұл кісілер қолына таспихын алып, иманын күшейтіп, истихфар, салауат ай­тып жүрсе, рух күшейер еді. Рух күшейген соң олар тілдерінен дұғалы сөз шығатын, ірі сөйлейтін ақсақалға айналар еді. Он­дай мықты аталарының айтқанын бала­лары мен немерелерінің екі етпесі анық. Көргенді ата мен дана әженің тәрбиесін көріп, ата дініміздің асыл тұнығынан су­сындап өскен баланың бұзық болмасы да белгілі. Ең бастысы, оңы мен солын та­нитын ондай бала дін атын жамылған жат ағымдарға ешқашан еріп кетпес еді. Теолог болған соң теріс ағымдар жетегінде жүріп, сотталған жастармен жұмыс жүргіземіз. Сонда сөйлескен балалардың барлығы дерлік ата мен әже тәрбиесін көрмеген, салт­-дәстүрімізден, тарихымыздан бейха­бар болғанын байқаймыз. Егер «тәйт» деп, дер кезінде тыйып тастап, ұлағатты әңгіме айтып отыратын аталары болса, бұл бала­лар адаспаған болар еді. Сондықтан «мен қартайдым, енді кімге пайдам тиеді» демей, жастар тәрбиесімен айналыса беру керек. Ақсақал ұсақталса, ұрпақ жоғалатынын, бүкіл елдің руханияты ақсақалдың бата­сына байланысты екенін бір сәтте естен шығармайық. Біздің тарихымызда солай болды және солай болып қала бермек. Рауан Жұмабайұлы мемлекетіміз­дің исламға қарсы емес, теріс бағыттағы исламға қарсы екенін атап айтты. Сондықтан дінімізді насихат­тап жүрген имамдарға тіліміз тиіп кетпе­сін. Олай болса, Алланың дініне тіліміз тиіп кеткені екенін жеткізді. Ғалымның тұшымды сөздерін ұйып тыңдаған ақсақалдар сауалдарын қойып, өз ой­пікірлерін де білдірді. Ал Сабақбай Тілегенұлы ақсақал кездесудің тартымды өткеніне разы болғандықтан сол мезетте жүрегін жарып шыққан төмендегі өлеңін арнады. Ақтардыңыз ойыңыздың шын бәрін, Түсіндіріп дінімізде мін барын. Көзін аштың біздей ардагерлердің, Теолог інім, Рауан атты діндарым. Білігіңе жоқ ешқандай секем шын, Ислам жолын нық ұстанған бекемсің. Жаулап алған тыңдаушылар санасын Үлгі алардай нағыз ұстаз екенсің. Терең білген біздің діннің саласын, Ерекшелеу өмірге көзқарасың. Үлкендерге діни ақыл беретін Біздер нағыз аңсап жүрген баласың. Білімі мол, болмасақ та ірі біз, Ниеті түзу ақсақалдың біріміз. Дін жолында бізді сауаттандырып, Ортамызға жиі келіп тұрыңыз. Сондай­-ақ ағамыз «Боевое братство» ҚБ төрағасы М.Шаулиевке деген ризашы­лығын мынадай бір шумақпен жеткізді: Теологті бастап келе жатқан бала, Ауған асып, талай орден таққан бала. Сапарың сәтті болсын Маңғыстауға, Жақсы інім, батыр тұлға, Мәтжан бала. Қарттардың әдемі сөздері мен ақ бата­сынан кейін осындай кездесу өнер мек­тебінде жалғасты. Мектеп залында жиналған оқушыларға Рауан Жұмабайұлы балаларға түсінікті тілмен насихат айтып, жат ағымдардың қайдан пайда болға­нын, оның басында тұрған адамдардың мақсаты қандай екенін жан­-жақты тү­сіндірді. Ашық-­жарқын әңгіме барысын­да оқушылар дін тақырыбында сауалда­рын қойып, тұшымды жауап алды.

Валентина ҚОЗЫБАҚОВА