Шетелдің киностудия өкілдері елде фильм түсіруді жоспарлап отыр
[ 2019 ] 5 шілде, 13:48 | Қоғам
Маңғыстауға АҚШ, Жаңа Зеландия, Словениядан Discovery, NBC Universal, Global Film Solutіons, Lionsgate, Warner Horison сынды ірі голливудтық кинокомпания өкілдері келді. Олар Қазақстанда фильм түсіруді жоспарлап отыр. Екі күнге созылған сапар аясында шетелдіктер Шерқала тауын, жерасты мешіттерін аралап, шар тәріздес алып тастардың тарихымен танысты, - деп хабарлайды mangystaumedia.kz сайты.
Шетелдік киностудия өкілдері бұған дейін Нұр-Сұлтан қаласында өткен ХV Халықаралық «Евразия» кинофестивалінің ашылуына келген шетелдіктер елорда мен Алматы облысында болған. Содан кейін Маңғыстауға ат басын тіреді. Елде кино түсіру мақсатында тарихи орындар мен ескерткіштердің, киелі жерлердің тарихымен танысты.
Айта кетейік, биыл 3 қаңтар күні кино туралы заң енгізілді. Онда елімізде түсіретін фильмдерге шетелдік продюсерлердің барынша қолдау көрсетілетіндігі жазылған.
«Нұр-Сұлтаннан бастау алған сапарымыз қызықты сәттерге толы болды. Көп тәжірибе жинадық. Ерекше шабыт алдым, табиғат қандай ерекше. Барлық жүріп өткен жерлерімізді бейнетаспаға түсіріп келеміз. Видео – ролик жасап, өз елімізге барғанда көрсеткіміз келеді. Қандай бағытта кино түсіретінімізді алдағы уақытта жоспарлаймыз», - дейді Discovery арнасының вице-президенті Джорджина Суртис.
Жетісу өңірі мен маңғаз Маңғыстаудың тамаша табиғаты шетелдік кинокомпания өкілдерін ерекше таңғалдырған екен.
Жұлдызай ҚАЛИЕВА
Суреттерді Өңірлік коммуникациялар қызметі ұсынды
893
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
