Кәсіпкерлерге тиімді жаңа жобалар

©

Жуырда өңірлік коммуникация қызметі алаңында кәсіпкерлерді несиелендіру және қолдау мақсатында қолға алынған жобаларды жариялау бағытында брифинг өтті. Оған облыстық индустриялық-инновациялық даму басқармасының бөлім басшысы Амангүл Бегиева, «Даму» кәсіпкерлікті қолдау қорының Маңғыстау облыстық филиалы директоры Гүлжан Қалымбетова және «FORTE BANK» АҚ МО филиалы директоры Аббат Өрісбаев қатысты. ҚР Үкіметінің №820 қаулысына сәйкес «Ба­сымдық берілген жобаларды несиелеу ме­ханизмі» аясында ҚР Ұлттық банкі екін­ші деңгейдегі банктерді қаржыландырған болатын. Сол қаржыландырудың есебінен екінші деңгейлі банктерден кәсіпкерлерді несиелендіру жобасына 600 млрд. теңге қа­растырылған. Атап айтар болсақ,  агроөндіріс кешенін­де қайта өңдеуге 100 млрд. теңге, агроөндіріс кешенінде өндіруге 100 млрд.теңге, өңдеу және қызмет көрсетуге 400 млрд.теңге бөлінген. Сонымен қатар  «Даму» қорының «Бизнестің жол картасы – 2020» мемлекеттік қолдау мен дамыту бағдарламасы шеңберінде «Даму» қоры арқылы өңдеу, өндірістік және сервистік қызметтерді жүзеге асыруға бағытталған жобалар бойынша субсидиялау іске асады. Ал агроөнеркәсіп кешеніндегі өндірістік жобалар Ауыл шаруашылық министрлігі арқылы субсидиялана­ды. Қаржыландырудың негізгі шарттары келесідей: несие­нің сыйақы мөлшерлемесі 15 пайызға дейін, бір қарыз алушының максималды лимиті – шектеусіз, қатысушылар бағдарламада бекітілген тізім бойынша ғана сала таңдай алады. Қолдауға ие болған мекеме қаражатты алғаннан кейін жұмыс орнын өсіруге, 2 жыл ішінде табыс көлемін 10 пайызға ұлғайтуға міндетті. Субсидиялау инвестициялар бойынша 7 жыл, айналым қаражаттарын толықтыру бойынша 3 жыл мерзімге дейін жүргізіледі. Осы бағытты реттейтін заңнамаға механизм­дерін жетілдіру бойынша көптеген өзгерістер енгізілген. Соның бірі – несиелерді кепілдендіру құралы. Егер несие алғысы келген кәсіпкердің кепілзаты жеткіліксіз болған жағдайда, «Бизнестің жол картасы – 2020» мемлекеттік қолдау бағдарламасы аясында «Даму» қоры арқылы кә­сіпкерге кепілзатын толықтыруға қосымша қаражат бө­лінеді. Кепілдік мерзімі несие мерзімінен аспайды. Бас­тысы, кепілдік көлемі кәсіпкердің алғысы келген несие сомасының 50 пайызынан көп болмауы тиіс. 3–5 млрд. теңге аралығында несие алушыларға кепілдік көлемі 20 пайыз. Несиелеу бағдарламасына негізінен жеңіл өнеркәсіп, жиһаз өнеркәсібі, тамақ және қайта өңдеу өнеркәсібі, сон­дай-­ақ құрылыс материалдары өндірісі және туризм, білім саласы, көлік және логистика саласындағы қызмет түр­лерін қамтитын жобалар мен барлық бизнес субъектілері қатыса алады. Жоба аталған салаларды дамыту мәселесіне қатысты, соның ішінде жүйелік деңгейдегі, орталық және жергілікті деңгейдегі бірқатар іс­-шараларды қамтитын 9 та­раудан тұрады. «Қарапайым заттар экономикасын» дамыту жөніндегі үкімет тапсырмасына сәйкес облыс әкімдігі мен «Атамекен» өңірлік кәсіпкерлер палатасы негізінде құрыл­ған жобалық кеңседе тиісті іс­-шаралар жоспары жасақтал­ған. Жоба бойынша облыс аумағындағы кәсіпкерлерден 40­-тан астам өтініш келіп түскен. - Бүгінгі таңда екінші деңгейдегі банктермен жалпы сома­сы 3,0 млрд.теңге болатын 9 жоба, оның ішінде 2,46 млрд. теңгелік 7 жобаны «Даму» қоры мақұлдап отыр. Жалпы со­масы 2,20 млрд. теңге құрайтын 5 жобаны субсидиялау ту­ралы келісімге қол қойылған. Сондай­-ақ 20 млн. теңге сома­сында несие бойынша 1 жоба, 10 млн. теңге немесе несиенің 50%-­ына кепілдеме алған. Соның ішінде өңіріміздегі өңдеу өнеркәсібіндегі азотты минералды тыңайтқыштар өндіретін ірі кәсіпорын «ҚазАзот» АҚ да осы бағдарлама аясында несие алуға қол жеткізген. Аталған салаларда бизнестерін бастауға ниетті азаматтар толық ақпаратты «Атамекен» кәсіпкерлер палатасынан, «Даму» кәсіпкерлікті қолдау қо­рынан және екінші деңгейлі банктерден ала алады, – дейді «Даму» кәсіпкерлікті қолдау қорының Маңғыстау облыстық филиал директоры Гүлжан Жолмұрзақызы. Айта кететін бір жайт, осы жобаның арқасында кәсіби спортшыларды дайындайтын спорт-­сауықтыру кешені ашылатын болды. Кәсіпкердің құны 100 млн. теңге тұратын ұсынысын «FORTE BANK» мақұлдап, кешен 2020 жылдың мамыр айында ашылады деп жоспарланды. - Бұл дегеніміз – кәсіби спортшылар үшін таптырмас мүмкіндік. Өйткені олар жаттығу үшін шетел аспай, өз елімізде дайындалып, олимпиада ойындарына мейлінше қа­тыса алады. Мысалы, соңғы кезде ел аумағында қарқынды түрде дамып келе жатқан ережесіз жекпе-­жек спортшылары Түркияға немесе Дағыстан елдеріне барып таулы аймақта жаттыққанды қалайды. Спортшылар ол жаққа табиғатына қызығып емес, кәсіби спортшыларды дайындауға арнал­ған кешендердің көптігі үшін барады. Спорт кешендері қажетті барлық жағдаймен қамтамасыз етілуі арқылы ерек­шеленеді. Жуырда спортшыларымыз игі істің жемісін өз жерімізде жаттығып жүріп көреді деген сенімдеміз, – деді «FORTE BANK» АҚ МО бойынша филиал директоры Аб­бат Жәңгірханұлы. Ал «Қарапайым заттар экономикасының» басқа жоба­лардан артықшылығына тоқталсақ. Біріншіден, кәсіпкер қандай сомада несие алам десе де шектеу жоқ. Екіншіден, несиенің 50 пайызын «Даму» кәсіпкерлікті қолдау қоры субсидиялап, 5 млрд. теңгеге дейін несиеге кепіл бола алады. Мамандардың айтуынша, аталған жобаны құруда Қазақстанның ұтатын тұсы көп. Өйткені бізде өзімізден шығатын сапалы әрі арзан шикізат мол және елімізде жеткілікті энергия қоры бар. Сондай-­ақ өзге елдермен са­лыстырғанда Қазақстанда қолайлы бағаға жұмыс күшін табудың да мүмкіндіктері мол. Күнделікті адам тұрмысына қажетті киім, жатын орындары, тамақ өнімдері өзімізде өндірілсе, мемлекет қорымен қатар халық үшін де пайда­сы ұшан теңіз. «Қарапайым заттар экономикасына» қысқа­ша түсініктеме бере кетудегі мақсатымыз – осы жайттарды баяндау. Түптеп келгенде бұл ұлттық қауіпсіздік үшін өте маңыз­ды, – деп қорытындылады брифингке қатысушы спикерлер.

Мадияр ТӨЛЕУОВ