Дарынды оқушылар бас қосқанда...

Облыс әкімінің орынбасары Руслан Сәкеев жылдағы дәстүр бойынша өңірдің дарынды оқушыларымен арнайы жайылған ақ дастархан басында кездесті. Шараға жаңалыққа жаны құштар, ізденімпаз, мақсаты айқын, еңбекқор 102 оқушыдан бөлек басқарма, аудандық, қалалық білім бөлімдерінің басшылары, ардагер ұстаздар, кәсіпкерлер қатысты. Сонымен қатар өлкемізге белгілі қаламгер, жазушы Әбіш Кекілбаевтың аяулы жары Клара Жұмабаева да кеште арнайы қонақ болып, дарынды оқушыларды жеткен жетістіктерімен құттықтап, ақ тілегін жолдады. Облыс әкімі Серікбай Трұмовтың арнайы сәлемдемесін ала келген Руслан Сәкеев жиналған оқушыларға құттықтау лебізін жеткізді. «Біз сіздер секілді топ жарып шыққан дарын­дылармен кездескені­мізге қуаныштымыз. Біздің болаша­ғымыз – сіздер. Алдағы уақытта елге келіп қызмет ететін жас мамансыздар. Жаңа идея – жастардан. Сондықтан сіздердің әрбір айтқан тың жобаларыңыз өңірді дамытуға ауадай қажет. Келешекте өз туған жерлеріңізге ке­ліп, сапалы қызмет етеді деген сенім­деміз. Жұлдыздарыңыз жана берсін! Биіктерден көріне беріңіздер!» – деді Р.Сәкеев. Бас қосуға келген оқушылардың әрқайсысы өзіндік ерекшелікке ие. ҚР тұңғыш Президенті Н.Ә.Назарбаев «Жастар – еліміздің қазіргі әлемдегі бәсекеге қабілеттілігінің негізгі фак­торы. Қазақстанның болашағы сіз­дерге, сіздердің білімдеріңізге, энергияларыңыз бен патриотизмдеріңізге байланысты» деген болатын. Міне, осы  орайда ел дамуына өзіндік үлес қосқан оқушылардың табысқа жету тарихы әдетте құрғақ фактілер мен цифрлардың тасасында қалмай дәріптелуі қажет. Сол мақсатта шараға келген әрбір оқушының дарыны мен табысқа жету жолы та­ныстырылуы көзделген. Мұнайлы ауданы, Қызылтөбе ли­цейінің 10-­сынып оқушысы Қонай Жетесовтің арманы – ғарышкер болу. Оның айтуынша, ол үнемі ар­манының жетегінде көктегі барлық жұлдыздарға қиялындағы әуе ке­месімен саяхат жасапты. Міне, күндердің күнінде ол жер кіндігі Байқоңырда бала күнгі арманымен кездесіп, зымыранды көзбен көрді, қолмен ұстады. Қиялы шындыққа айналды. Сәуір айында Байқоңыр қаласында өткен «Ғылым әлемін ашамыз» ғарыштық зерттеулер бойынша халықаралық ғылыми жарыста жүлделі орынға ие бол­ды. Ол болашаққа ойлы көзбен қарап, ғылым жолында үлкен жобаны қолға алыпты. Арма­ны асқақ, мақсаты айқын жас дарын болашақта көкке ұшатын зымырандардың тиімді қызмет ет­кенін қалайды. «Биылғы ғылыми жобада «Зы­мыран ұшыруда магнитті үдеткішті қолдану» тақырыбында жоба қор­ғап, республикалық, халықаралық деңгейде үлкен жетістікке жеттік. Командалық жұмысымыздың еңбе­гі ақталып, төрешілердің алдын­да жоғары бағаға ие болдық. Біздің қолға алған жобамыз – қазіргі таңда ең өзекті тақырып. Мәселен, ғалым­дардың зерттеуі бойынша бүгінгі күні қолданыстағы зымырандар Марсқа 6 айда жететін болса, біздің ойлап тапқан зымыран қозғалтқышымен не бары 2­-3 айда жетуге болады. Сонымен қатар қазіргі зымырандарға дизель, газ қолданылатын болса, біздің жоба­мызда азотты қолдануға болады. Әрі арзан, әрі қолжетімді, әрі тиімді. Бұл жоба – менің бала күнгі арманымның жалғасы», – дейді Қ.Жетесов. Cалтанатты жиынға келген дарынды оқушылардың жалындаған жүздерінен өңірді жан­жақты дамытуға деген құлшынысын анық аңғаруға болады. Тіпті облыстағы мал шаруашылығына да бейжай қа­рамайтындары да ортамыздан табылды. Со­лардың бірі – Назарбаев зияткерлік мектебінің 10-­сынып оқушылары Асқар Ғаламмадин мен Гүлназ Жұмахан. Олар болашақта шалғай жатқан өңірлердің мал шаруашылығына энергияның балама көздерін пайдалануды көздейді. Осы­лайша ауыл шаруашылығын дамытуды тиімді жүзеге асыруға өз үлестерін қоспақ. Одан бөлек Маңғыстау ауданы, Өтес орта мектебінің 11­-сы­нып оқушысы Жансұлу Баймағанбетова маңғаз Маңғыстаудың мыңжылдық тарихына орай, сақ, сармат заманынан қалған болмысы бөлек Бәйті ғибадатханасын зерттеуде өзіндік үлес қосуды қолға алыпты. Қатарынан оза шапқан дарындылардың ара­сында өз бауырларын өрттен құтқарып, аман алып қалған батыр бала – Дархан Әмірхан да бар. Ол қайсарлығы үшін Айдын Айымбетовтің қолынан «Батыр бала» төсбелгісімен марапатталған. Дарханның арманы – тәртіп сақшысы болу. Өзі өнерден де құр емес. Абай, Шәкәрім әндерінің орындаушысы. Бүгінде ол – қазақстандық жас патриоттар академиясының құрама мүшесі. Осылайша салтанатты кездесуге қатысқан қаншама жас буынның дарыны мен талантына куә болып қайттық. Шара соңында оқушыларға облыс әкімі атынан кәсіпті игеріп, дамыту жолында мотивация беруші блогер Қуаныш Шоңбайдың «Екінші болма» кітабы мен 50 мың теңгелік сер­тификат табысталды.

Айгүл ОРЫНБАЕВА