Жаңаөзен әкімі Қызылсайдағы мерейтойға дайындықпен танысты

60 жылдық мерейтойға орай жасалып жатқан жұмыстар легімен танысу үшін жұма күні Жаңаөзен қаласының әкімі Әділбек Дауылбаев пен қалалық мәслихат хатшысы Сақи Мыңбай Қызылсай ауылына барды. Алдымен С.Бегендікұлы атындағы №4 орта мектепте орналасқан сайлау учаскесінде болып, одан кейін орыс әулие қорымының сыртын қоршау жұмыстарын  көрді. Қызылсай ауылында орналасқан «СтройПластАқтау» ЖШС - гипс және құрғақ құрылыс қоспаларын шығаратын кәсіпорын. 2018 жылы жеке кәсіпкер Серікбол Боранқұлов ашқан зауытта бүгінде 10 адам еңбек етеді. Сапар барысында қала әкімі аталған зауыт жұмысымен де танысты. - Өнімді дүкендерге, базардағы құрылыс нүктелеріне және Ақтау қаласына жіберіп отырмыз. Сұраныс жақсы. Мейрамханалар ішкі-сыртқы жөндеу жұмыстарына алып жатыр. Шикізат өзіміздің карьерлерден жеткізіледі, - деген зауыт иесі С.Боранқұлов алдағы уақытта кәсіпорынды кеңейтіп, жұмысшы санын кем дегенде 30-40 адамға дейін көбейтпек ниетте екенін айтты. Сондай-ақ кәсіпкер Жаңаөзен қаласының әкіміне зауыт жұмысына керек қаржыны банктен несиеге алғанын, қазір 16 пайызбен үстеме төлеп отырғандығын айтып, мемлекеттен шығынды субсидиялауға көмек сұрады. Ә.Дауылбаев мәселені жан-жақты қарастыруға уәде берді. 60 жылдықтың аясында атқарылып жатқан жұмыстардың ең ауқымдысы – Қызылсайдың тарихынан сыр шертетін стелла құрылысы. Ауыл кіреберісінде бой көтеріп жатқан нысанның құрылысы бүгінде қарқынды. Ұйымдастырушылардың айтуынша, жаздың аяғына дейін толықтай бітуі тиіс. Бірқатар нысандарды аралаған Әділбек Дауылбаев ауылдың экономикалық-әлеуметтік жағдайы туралы да ақпараттар алып, алдағы уақытқа жоспарлар жасақталатынын жеткізді.

Айжан НАСЫРОВА

[gallery td_select_gallery_slide="slide" ids="81044,81045,81047"]