Балалардың жазғы демалысы қалай ұйымдастырылмақ?

©

Таң атса, күн батып, көктем мезгілінің соңғы айы да аяқталды. Балалар оқу жылын аяқтап, жазғы демалысқа шықты. Соңғы қоңыраудың сыңғыры естілісімен-ақ ата-ананы әбігерге түсіретін бір жайт баласының жазғы демалысты жақсы өткізуі десек, қателеспеспіз. Оқушылар үшін ең қызықты мезгіл — жаз маусымы. Үш ай демалыста балалар алаңсыз асыр салып ойнап, бір жасап қалады. Оқушылардың дені өздері оқитын мектеп жанындағы лагерьлерге барса, енді бірі өзге қалаларда орналасқан республикалық лагерьлерге барып демалады. Ал сол балалар үшін демалыстың көркі болған лагерь Маңғыстау ауданының балаларына биыл қалай ұйымдастырылмақ? Бұл сұраққа жөнінде Маңғыстау аудандық білім бөлімінің басшысы С.Қалиевадан жауап алған болатынбыз. «Балалардың жазғы демалысы 2 бағытта ұйымдастырылатын болады. 1) Жазғы демалыс, сауықтыру (7-13 жас); 2) Еңбекпен, танымдық шығармашылық, спорттық, туристік, интеллектуалдық, тілдік шаралармен қамту (7-18 жас). Оқушылардың жазғы демалысын және түрлі сауықтыру шараларымен ұйымдастыру бағытында 61 сауықтыру орындары қала сыртындағы 2, мектеп жанынан тамақтандырумен 18, 20 кәсіптік және 22 палаталық лагерь ұйымдастырылады. Жазғы сауықтырумен жалпы 7593 баланы қамту жоспарланып отыр, бұл барлық балалардың 100% құрайды. Жалпы жазғы сауықтырумен бірінші кезекте әлеуметтік санаттағы балалар қамтылатын болады. Олардың саны — ауданда 927 бала. Ерекше қамқорлықтағы балалар (мүмкіндігі шектеулі) саны — 68. Маңғыстау облысы білім басқармасының ұйымдастыруымен Ақтау қаласындағы «Балдәурен» жазғы сауықтыру лагеріне 40 бала демалады деп жоспарласақ, «АДЖИП Каспиан СИ Б.В.» мекемесінің демеушілігімен Италияның Чезенатико қаласына жетім және мүжәлсіз отбасының 5 оқушысы тамыз айында аттанады. Жетім және ата-ана қамқорлығынсыз қалған, көп балалы, аз қамтылған отбасынан шыққан 280 баланы жергілікті бюджет есебінен қала сыртындағы жазғы сауықтыруға барады деп ұйғарып отырмыз. Ал еңбекпен, танымдық шығармашылық, спорттық, туристік, интеллектуалдық шаралармен 7072 бала қамту жоспарланып отыр. Оның 1456-сы — еңбекпен, көгалдандырумен, 2157-сі — аула клубтарында, түрлі үйірмелерде 3 тілдік, ІТ сыныптары, роботтехника үйірмесі, 2634-і — туристік-өлкетану бағытындағы саяхатпен, 1764-і — «Жасұлан», «Жасқыран» әскери патриоттық және тілдік, дебаттық үйірмелерде қамтылады. Жалпы кәсіптік лагерьлер ұйымдастыру кезінде келесі жұмыстар жүргізіледі:

• «Рухани жаңғыру» аясында жаңартылған білім беру мазмұнын, үштілдікті ілгерілету мақсатында мектептер жанынан оқушыларға арналған тілдік лагерь;
• Туризм орталығымен құрылған 10 жорық жобасы-Ақмыш, Самал, Көгез этноауыл, Шерқала тауы, Айрақты тауы, Отпан тау бағыты;
• ІТ сыныптарда балаларды Питон, Скрейтч бағдарламаларын оқыту курстары ауданда Б.Жұмалиев, А.Меңдалыұлы, Е.Айшуақұлы, С.Нұрниязұлы, Қаратөбе орта мектептерінде өтеді.

Айта кету керек, жергілікті бюджеттен балаларды сауықтырумен және еңбекпен қамтуға 18160,00 млн.теңге қаралды. Оның ішінде:

• Қала сыртындағы лагерьлерге 11660,00 мың теңгеге 280-300 оқушы қамту жоспарлануда;
• Мектеп жанындағы лагерьлерге 6500,00 мың теңгеге 1950 оқушы қамтылады. Каспий теңізіне, табиғат аясына 1 күндік саяхат ұйымдастырылады.

Аудан әкімдігінің атынан Қарақұдықмұнай, Кенсары, Коммунай, Маңғыстаумұнай, КаспийЦемент мекемелерінің демеушілігімен әлеуметтік осал отбасы балаларын демалтуға барлығы 100 оқушыға жолдама сұралады. Осымен қатар ата-ана есебінен, кәсіподақ есебінен 2300 оқушы қамту жоспарланып отыр», - дейді С.Қалиева. «Қара қарғаның миы қайнайтын шілденің ыстығында баласы ауылда құр босқа жатпай, жазғы демалысы төрт қабырғаның ішінде өткізбесінші» деген ата-ананың тілегі орындалып, жазғы сауықтыру шаралары ұйымдастырылса, бала көңілінің көпке дейін көтеріліп жүретіні анық.

Айгүл РАХМЕТОВА