Бейнеуде дүниежүзілік кітап күніне орай ерекше апталық өтті
[ 2019 ] 25 сәуір, 06:19 | Қоғам
Кітап - адамзаттың баға жетпес құндылығы, оқырмандар үшін мәңгілік рухани азық. Елбасы Н.Назарбаевтың «Болашаққа бағдар: рухани жаңғыру» бағдарламалық мақаласының «Туған жер» бөлімінің басты бағыттардың бірі - кітап оқитын қоғамды қалыптастыру. Осыған орай, Бейнеу кітапханасының ұйымдастыруымен 23 сәуір – Дүниежүзілік кітап және авторлық құқықты қорғау күніне орай жас буынның кітап оқуға қызығушылығын арттыру мақсатында 17 – 23 сәуір аралығында «Бақытты кітап күні» апталығы өтті.
Апталық «Әлемді кітап арқылы танимын» атты кең көлемді кітап көрмесімен бастау алып, онда кітапхана ұжымының қызметкерлері ең көп оқылатын кітаптар, үздік детективтер, заманауи кітаптарды оқырманға таныстырып, олар жайында толық мағлұмат берді. Таныстырылым барысында жастардың үздік детективтер мен соңғы шыққар кітаптарға деген қызығушылығы байқалды.
Сонымен қатар аудан тұрғындары арасында «Кітапханаға кітап сыйла» акциясы ұйымдастырылып, нәтижесінде ауданның бірнеше тұрғыны жеке кітапханаларынан 200 жуық кітапты сыйға тартты.
Апталық аясында әлеуметтік желідегі оқырмандар арасында «Сүйікті кітабыммен селфи» конкурсы, «Жасөспірімдер» кітапханасында кітапханаға тұрақты келетін оқырмандар арасында әдеби шығармаларға арналған «Өзіңді оят» атты тренингі өтсе, Бейнеу ауылдық кітапханасы орталық алаңда «Әлемді кітаппен таны» блиц сауалнамасын жүргізді.
Шара «Кітапхана айдынында» атты оқырман бенефисімен жалғасын тапты. Кітап алып оқып қана қоймай, оқығанымен, бар білген, ойға түйген әңгімелерімен бөлісіп, кітапханадағы түрлі іс-шараға белсене ат салысып, жастарға бағыт-бағдар беріп жүрген ауданға белгілі ақын, журналист Кәрісбай Әділ, "Жасөспірімдер" кəтапханасының тұрақты оқушысы, кітапқа жаны құмар Назира Трумова және «Балалар» кітапханасының тұрақты оқырманы Хадиша Керекова осы жылдың үздік оқырманы ретінде таңдалып, оқырман бенефисінің басты кейіпкерлері ретінде шақырылды.
Аталған кеште кітапхана директоры Таңат Амалбаев жиналғандарды кітап мерекесімен құттықтап, жылы лебізін білдірді. Кеш барысында бенефистің басты кейіпкерлеріне кітап төңірегінде бірнеше сұрақ қойылып, әңгіме өрбіді.
Кеш қорытындысында кітапхана директорының орынбасары Г.Әбуова «Сүйікті кітабыммен селфи» атты конкурстың жеңімпазы Назым Бақытоваға, конкурсқа қатысып, жоғары нәтиже көрсеткен Айбар Нұржанов пен Зәмзәгүл Сайыноваға, «Өзіңді оят» тренингінің жеңімпазы Күйкен орта мектебінің оқушылары мен белсене қатысқан Атамекен орта мектебінің оқушыларына алғыс хат, оқырман бенефисінің қонақтарына арнайы сыйлықты табыс етті.
Үміт ҚАЗДАЕВА
1217
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.