Кезектен тыс президент сайлауы: қоғам өкілдері не дейді?

Ел тағдырын шешетін – сайлау

Наурыз айының 19-ы қазақстандықтар үшін тарихи сәт болғаны баршамызға белгілі. Елбасымыз Нұрсұлтан Назарбаев заңды түрде және өз еркімен өкілеттігін тоқтатқан сәтте халық, шын мәнінде, абдырап қалды. Еліміздің болашағын ойлап, алаңдағаны да жасырын емес. Себебі 30 жыл басқарған Н.Назарбаев халықтың шын ықыласына бөленіп, берекесі мен тыныш- тығының, тәуелсіздігінің кепілі бола білген еді. Одан кейінгі ел тізгінін уақытша ұстаған Қасым-Жомарт Тоқаевты да халық жақсы қабылдады. Алайда бейбітшілік пен ынтымақ тұрақты билікке байланысты болғандықтан, халықтың көкейінде тағы да бір сұрақ мазалап жатты. Ол, әрине, президент сайлауы еді. Осыған орай, күні кеше Қ.Тоқаев мәлімдеме жасап, елдің алаңдаған көңілін жақсы жаңалықпен басты. Енді 9 маусымда Қазақстанның екінші Президентін сайлайтын боламыз. Оған Мемлекет басшысы әділ өтуіне кепілдік беретінін айтты. Бұл – елдің тағдырын шешетін нақты қадам. Шын мәнінде, біз қоғамдық-саяси келісімді қамтамасыз ету үшін, әлеуметтік-экономикалық міндеттерді орындауға айқындықпен жетуге, уақыт оздырмай, халқымыздың ауызбіршілігін сақтап, кезектен тыс президент сайлауын өткізуіміз керек. Ел ішіндегі «Енді не болады, болашағымыздың бейнесі қалай болмақ?» деген ойларға нүкте койылатын күн жақындап қалды. Сонымен қатар келесі 2020 жылы елімізде он жылда бір келетін маңызы өте зор халық санағы болатыны белгілі. Сайлауды сонымен қабаттастырмай, биыл өткізіп алғанымыз өзіміз үшін де жақсы. Сайлауды өткізіп, қазіргі кезеңнен тезірек өткеніміз абзалырақ болады. Қалай болғанда да бұл сайлаудан бірінші кезекте ұтатын – халық. Себебі халықтың тұрмысы түзеліп, әл-ауқатының жақсы болуы биліктің тұрақтылығына байланысты екені сөзсіз. Сондықтан Қазақстан Республикасы Президентінің кезектен тыс сайлау өткізу туралы шешімін бірауыздан қолдап, ел тағдыры үшін, болашақ үшін мемлекеттік саясаттың жауапты сәттерінде облыс ардагерлері белсенділік танытады деген сенімдемін.

Серікбай ТӨЛЕТОВ, облыстық ардагерлер кеңесінің төрағасы

***

Сайлау өткізу – дер кезінде айтылып отырған мәселе. Жаңа Президент сайлау үшін тағы жыл жарым уақыт күтудің қажеті жоқ деп ойлаймын. «Президентті халық таңдай- тын болады. Мен басшы ретінде сайлаудың әділ әрі таза өтуіне кепілдік беремін», – деп Президент Қасым-Жомарт Тоқаевтың өзі айтты. Халыққа, ең алдымен, тұрақтылық пен тыныштық керек. Президент тағына елдің жағдайын ойлайтын, қарапайым, халықтың қамын жейтін елжанды азамат отыратынына сенемін. Себебі біздің дана халқымыз жаңа елжанды Президентін жаңылмай табады. «Ел ағасыз болмас, тон жағасыз болмас» дегендей, елдің билігін өз қолына алып, Елбасымыз салған сара жолды әрі қарай ұлы даңғылға айналдырады деп үміттенеміз. Тәуелсіздігімізді тұғырлы, берекемізді баянды етіп, «Мәңгілік Ел» болуға бастайтын Президент сайлап, алға қойған мақсатымызға жете берейік! Біздің Мұнайлы ауданы облысымыздағы халық ең көп шоғырланған аймақ болғандықтан, үкіметтік емес ұйым атынан сайлау жұмыстарына әрдайым белсене араласумен келемін. Бұл жолғы сайлауда да халық өкілі ретінде Президент айтқандай саяси шараның әділ әрі таза өтуіне ат салысамын деп ойлаймын. Еліміз аман, жұртымыз тыныш болсын! Бір жағадан – бас, бір жеңнен – қол шығарып, сайлауға ұйымшылдықпен қатысайық! – дегім келеді.

Райхан ДӘРІБАЕВА, Мұнайлы аудандық «Азаматтық бастама» бірлестігінің төрайымы, қоғам белсендісі

***

Тәуелсіз Қазақстан тарихының тағы бір-бір парағы ашылды деуге негіз бар. Ағымдағы жылдың 9 маусымында елімізде кезектен тыс президенттік сайлау өтеді. Бұл туралы Қазақстан халқына Үндеуін жолдаған Мемлекет басшысы Қасым-Жомарт Тоқаев айтты. Әрине, бүгінгі күніміз ертеңгі тарих екенін ескерсек, бұл – ел тарихында жазылатын айтулы оқиғаның бірі болып қалады. Егемендігін екшелеп, тәуелсіздігін тұғырлы еткен бұл елге, тарихта жақсы атымен қалар басшы келеді деп ойлаймын. Қазақ тарихына үңілер болсақ, сонау Керей мен Жәнібектен басталған елдің тізгінін ұстаған азаматтарымыз, хан-сұлтандарымыз аз емес. Солардың қатарына, 9 маусым күні қазақтың маңдайына жазылған тағы бір «жарық жұлдыз» жарқырайды деп сенемін.

Мұқаш ОРАЛБАЕВ, «Бекен» жас көшбасшылар қауымдастығы төрағасы

***

Ортақ тарих пен тағдыры біріктірген қазақстандық қоғам жаңа кезеңдегі жауапты міндет – кезектен тыс президенттік сайлауда жарқын келешекке, мемлекетіміздің тұрақты дамуына бастайтын бағытты қолдап дауыс береді деп ойлаймын. Сындарлы сәттерде ақыл-парасатпен шешім қабылдайтын халық жаңылыспайды деп сенемін.

Кирилл ОСИН, «Эко Маңғыстау» үкіметтік емес мекемесінің жетекшісі