Тұрмыстық жиһаз дайындайтын маман: "Кәсіпкерге уақыт қымбат"

Бүгінгі кәсіпкер жас — тәуелсіздік ұрпағы. Олардың болмысында жаңа нарықтық экономикаға бейімділік, биік мақсаттарын жүзеге асыруға талмас күш-жігер, намыспен ұмтылатын бекзаттық қасиет бар. Асылбек Салихов - осындай ұстаныммен кәсіпкерлік тізгінін нық ұстап, өз шаруасын дөңгелетуімен көзге түсіп жүрген жастардың біреуі. Жуырда біз Асылбекпен Бейнеу ауылының Майлин көшесіндегі цехта қызу жұмыс жасап жатқан кезінде кездесіп, бір-екі ауыз тілдестік.

- Асылбек, Президенттің тапсырмасына сай өзіңдей кәсіпкер жастарға көптеген мүмкіндік алып келген Жастар жылына орай сізбен кездесіп, сұхбаттасу үшін бірнеше рет телефон шалғанбыз... - Әйтсе де сөйлесе алмадық демекшісіз ғой. Кешірерсіз. Елбасының тұтас жылды біздерге арнағанына көңіліміз әжептәуір көтерілді. Дұрыс айтып отырсыз, жыл бізге көп жақсылық алып келді. Елімізде жастар жылының жол картасы әзірленіп жатқанын білеміз, ауданда атаулы жылы кәсіпкер жастар мүмкіндігі кеңейетінен хабардармыз. Шынымды айтайын, қазір жұмысым көп, сөйлесуге уақытым жоқ. Білетін шығарсыз, кәсіпкерге уақыт қымбат. Әрбір тапсырысты уақытылы бітіруге міндеттіміз. Қолымдағы мына бұйымды (ол жасап жатқан диванды көрсетті) ертеңге даярлап үлгеруім керек. Қалай болса солай емес, жаңа үлгіні жетілдіре қолданып, фабрикадан шыққандай етіп жасауға көңіл бөлемін. - Кәсіпкерлікті қашан бастадыңыз, тұрмыстық жиһаздың қандай түрлерін жасайсыз? Бұл өнерді қалай меңгердіңіз?

- «Ұлы даланың жеті қыры» атты мақаласын оқығанымнан кейін ата-бабаларымыздың өзгелерден озық өмір сүріп, әлем өркениетіне сүбелі үлес қосқанына сенімім әбден нығайды. Өте дұрыс және дер кезінде ортаға тасталған салмақты ой.

Шындығында, өркениетті, өнерге жақын елдің ұрпағы болғандығымнан шығар, кішкентай күнімнен өнерге жақын болып өстім. 20-21 жасымда Алматыдағы үлкен жиһаз фабрикасында шебердің шәкірті болып жұмыс жасап, осы өнерге қанықтым. Қалған жағында әлеуметтік желілерді жалықпай қарап, өнерімді өз бетімше жетілдірдім. Қолымда өнерім бар, өнерлі жастарды қолдайтын мемлекеттік саясат бар заманда өз кәсібімді бастайын деген оймен «Атамекен» ұлттық кәсіпкерлер палатасы аудандық филиалының «Бастау-Бизнес» курсында оқып, сертификат алдым. Былтыр күзде 4 миллион теңге жеңілдетілген несие алып, жеке кәсіпкер болып тіркеліп, мына ғимаратты жалға алып, екі жұмысшымен кәсібімізді бастадық. Бүгінгі таңда клиенттердің тапсырысы мен жаңа үлгідегі диван, шкаф секілді тұрмыстық жиһаздың барлық түрін жасап жүрміз. Мақтанғанымыз емес, жиһаз жасатуға тапсырыс берушілер көбейіп келеді.

- Табысыңыз отбасыңыздың қажеттілігіне, салықты, жалға алған ғимараттың ақшасын төлеуге жете ме? Кәсіпті дамыту бағытында қандай жоспарыңыз бар? - Әрине жетеді. Кәсібімді дамыту жайлы ойымды айтсам, жаңа форматтағы құрал-саймандар алып, өндіріс көлемін жедел ұлғайту жоспарымыз бар. Халықтың сұранысын жіті назарымызда ұстап, сұранысқа сай бейімделуге дайын тұрамыз. Бұл - кәсіпкерліктің, жалпы нарықтың жазылмаған заңы. «Талапты ерге нұр жауар» деген емес пе атам қазақ. Бүгінгі заман талапты азаматтарға нұр жауатын заман. - Жұмыс үстінде болса да бір-екі ауыз тілдескеніңіз үшін ризамыз. Кәсібіңіздің ұлғайып, дамуына шын тілектеспіз!

Сұхбаттасқан Қартбай Қожаев