Е.Тоғжанов: "Бірде-бір арыз қараусыз қалмайтын болсын"

©

Облыс әкімінің қатысуымен өткен аппарат жиынында күн тәртібінде тұрған мәселелерден бөлек шешімін таппаған сұрақтар талқыланды. Соның бірі – кеше ғана Ақтау қаласында орналасқан «Айналайын» балабақшасында орын алған басшылар мен тәрбиешілер арасындағы келеңсіз жағдай. Айта кету керек, облыс көлемінде орналасқан балабақшалардағы кемшіліктер туралы осы уақытқа дейін айтылып та, жазылып та жүр.

Бірақ әлі нәтиже жоқ. Ел­басы 2018 жылдың 5 қа­занындағы Жолдауында «Мектепке дейінгі білім беру ұйым­дарының сапасын түбегейлі жақ­сартып, бүлдіршіндердің қауіпсіз­дігін қамтамасыз ету мақсатында балабақшалар толықтай бейнеба­қылау камераларымен жабдықта­луы тиіс», – деген еді. Осыған орай облыс басшысы  Е.Тоғжанов өт­кен жылдың аяғында құзырлы ор­гандарға арнайы мониторингтік топ құрып, балабақшалардың мә­селесін анықтау үшін тапсырма берген болатын. Нәтижесінде қала­дағы 37 балабақшаның 21-­і ғана бей­небақылау жүйесімен қамтамасыз етіліп, қалғандарында камералар жұмыс істемейтіндігі анықталған еді. Алайда жауапты мамандар 2019 жылға дейін бұл кемшілік­терді жоюға сөз берген­-ді. Десе де жауапсыздардың кемшілігінен күні кеше даулы мәселе орын алды.

«Барлық балабақшаның іші­-сыртында бейнебақылаулар орна­ластырылсын" деп тапсырма бердім. Енді, міне, «Айналайын» балабақ­шасындағы жағдайға байланысты оқиғаның ақ-­қарасын айыруға мүм­кіндік болмай отыр. Себебі ол жер­де камера жоқ. Әрбір баланың қауіпсіздігін тексеріп отыруға құқы­лымыз. Сондықтан барлық ауыл, қала әкімдеріне, басшыларға тапсырма: 1-­3 және 3­-6 жас арасындағы балалар­дың қауіпсіздігін бір жұманың ішін­де тексеретін болыңыздар, бірде-бір балабақша тыс қалмасын. Беріліп отырған тағамдары да бақылауда болсын», – деп Е.Тоғжанов жауапты қызметкерлерге қатаң тапсырма жүк­теді.

Одан бөлек өңір басшысы өз қыз­метіне салғырт қарайтын басшы­ларды сынады. Мәселен, қоғамдық денсаулық сақтау басқармасының "балабақшаларды кез келген уақытта тексере алмаймыз" деген сөзін тілге тиек етіп, керісінше бүлдіршіндердің қауіпсіздігін күнде қадағалауда ұстап отыру керектігін айтты. Осылайша әкім жоғарыда аталған мәселе бойын­ша арнайы комиссия тобын құрып, енді тек нәтиже күтетінін жеткізді.

Естеріңізге сала кетейік, осы айдың 16 жұлдызында, яғни өткен сенбіде облыс басшысынан бастап барлық әкімдер тұрғындарға ар­нап ашық есік күнін өткізді. Соның нәтижесінде облыс әкімдігінде 1025 адам қабылдауда  болып,  оның  221­-і өңір басшысымен жеке кездескен. 154 адам өз мәселелеріне байланыс­ты арыздарын қалдырған. Тағы бір айта кетерлігі, әкімдердің халықпен тікелей кездесуінің нәтижесінде көптеген азаматтың бірнеше жыл­дан бері шешімін таппай жүрген мәселелері анықталды. Мәселен, Маңғыстау ауданында 3 жылдан бе­рі «Алтын  алқаға» үміткер ананың «Күміс алқасын» ала алмай жүргені белгілі болды. Осы мәселе бойынша Е.Тоғжанов жақында тағайындалған аудан әкіміне тапсырма берді.

«Үш жылдан бері көп бала­лы ананың өзіне тиесілі «Күміс алқасын» алып бермеу не масқара? Бұл жағдайдың жігін жіктеп, кімнің кесірінен болғанын анықтаңдар және осындай сұрақтарға жауапты мамандардың барлығы керекті жаза­ларын алуы керек», – деді. Сондай-ақ Е.Тоғжанов ендігі жерде тұр­ғындардан келіп түскен арыздарды қатаң бақылауға алып, орындалысын қадағалауды орынбасарларына тап­сырды.

«Бұның барлығы – жауапкершілікті қажет ететін дүние. Жаңағы анық­талған мәселе бір шеті ғана. Қаншама осындай сұрақтар өз шешімін таппай келеді. Халыққа дұрыс бағыт-­бағдар, нақты жауап берілмейді. Дер кезінде шешім шығарылмайды. Содан тұр­ғындар арасында реніш туындайды. Барлық орынбасарларыма қатаң ес­керту, бірде-­бір келген арыз ескерусіз қалмайтын болсын», – деді ол.

Осылайша тұрғындардың түйінді мәселелерінің шешімін табуға жол ашқан ашық есік күні енді әр ай сай­ын өткізіліп тұратын болады.

Айгүл ОРЫНБАЕВА, Суретті түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.