Президент шыршасы балаларға қуаныш сыйлады

Балалардың жыл сайын асыға күтетін мерекелерінің бірі – жаңа жыл. Жаңа жыл – түрлі-түсті ойыншықтармен безендірілген шырша, әртүрлі ертегі кейіпкерлері, Аяз ата мен Ақшақар бүлдіршіндерге тамаша көңіл күй сыйлап, армандарына жан бітіріп, әртүрлі сыйлықтар үлестіріп, қуаныштарын еселеп, аппақ көңілдерін әрлей түсетін ерекше күн. Осыған орай, балалардың жыл бойы ерекше ықыласпен күткен мерекесіне орай кеше Маңғыстау облысының әкімі Е.Тоғжановтың қатысуымен Ақтау қаласының «Хан Шахар» салтанат сарайында ата-аналарының қамқорлығынсыз қалған, аз қамтылған, мүжәлсіз отбасы балалары мен отбасы үлгісіндегі балалар ауылының тәрбиеленушілеріне арналған Қазақстан Республикасы Президентінің атынан «Жарқыра, Қазақстан! Жарқыра, туған жер!» тақырыбы аясында жаңа жылдық шырша тойланды. Шараға облыстық мәслихат хатшысы С.Трұмов, департамент, басқарма басшылары, Қазақстан халқы Ассамблеясының мүшелері, ардагер ұстаздар, қалалық, аудандық білім бөлім басшылары және бұқаралық ақпарат құралдарының өкілдері қатысты.

Мерекеге орай Елбасы Н.На­зарбаев салтанатты мереке­ге жиналған балаларды келе жатқан жаңа жылмен құттықтап, видео­жолдауын арнады.

«Қымбатты балалар, мен сендерді және еліміздің барлық балаларын ме­рейлі мерекемен шын жүректен құт­тықтаймын! Бұл – өздеріңді жаңа ар­манға жетелейтін, жаңа үміт сыйлай­тын ерекше мейрам. Осы мерекеде бас қосуды бүкіл балалардың жыл бойы асыға күтетіні бекер емес. Бұл күні кез келген перзенттің аппақ көңілі, айтыла­тын ақжолтай тілектерінің орындалаты­нына сенемін. Шырша тойында өнер көрсетіп сыйлық алатын бүлдіршіннің қуанышынан артық ештеңе жоқ. Бала­лардың алаңсыз әрі бақытты өмір сүруі үшін біз барлық жағдайды жасап ке­леміз. Сондықтан бәрің де саналы тәр­бие мен сапалы білім алуға ұмтылула­рың керек. Бүгінде дүниежүзі тәуелсіз Қазақстанның жарқын жетістіктеріне құрметпен қарайды. Осындай мәртебелі мемлекетте, еркін елде өсіп жатқан сен­дер бақытты балаларсыңдар», – деп ақ тілегін жеткізді Президент.

Шараға арнайы қатысқан облыс әкі­мі Е.Тоғжанов та бүлдіршіндерді қуа­нышты мерекемен құттықтап, жылы лебізін білдірді.

«Біздер көк туы желбіреген тәуелсіз бақытты елде өмір сүріп жатыр­мыз. Бұл – тұңғыш Елбасымыз Нұр­сұлтан Әбішұлы Назарбаевтың ең­бегінің және халқымыздың бірлігі мен берекесінің арқасы. Сіздер ұлтын сү­йетін, Отанын қорғайтын, ата-­ананы сыйлайтын, ұстаздарын қадірлейтін, достықты бағалайтын, білімді азаматқа лайық болуларыңыз керек! Сондықтан бәріңізді талмай ғылым мен білім алуға, ерінбей еңбек етуге шақырамын. Келе­шекте елімізге адал қызмет ететін жан­дар – сіздер», – деді Ералы Тоғжанов. Сондай-­ақ өңір басшысы 2018 жылдың айтулы шараларының бірі Астананың 20 жылдығында, Каспий маңы елдерінің V саммитінде өнер көрсетіп, елмен бір­ге атсалысқан бүлдіршіндерге алғысын білдірді.

Жаңа жыл мерекесіне қатысқан 9–13 жас аралығындағы 250 балаға Қазақ­стан Республикасының Президенті аты­нан сырт киімдер, бас киім, шарф, аяқ киім, тәтті сыйлықтар, телефон сыйға тартылды. Сонымен қатар әр балаға Қазақстан Республикасы Президенті атынан Президенттің балалық шағы туралы «Назарбаевтай болғым келеді» кітабы мен құттықтау хаты табыстал­ды. Елбасының керемет сыйлықтары­на ие болған балалардың қуанышында шек жоқ. Ән айтып, би билеп, ертегі кейіпкерлерімен көңіл көтеріп, мереке­лік шыршаны сәтті аяқтаған бүлдір­шіндер «EL Divino» мейрамханасында мерекелік түскі ас ішіп, одан әрі теңіз жағалауындағы мифтер алаңына сая­хаттады.

Сондай-­ақ республикалық және об­лыстық байқаулардың жеңімпаздары атанған 15 бала «Балдәурен» респу­бликалық оқыту­-сауықтыру орталығы ұйымдастырған жаңа жылдық мерекелік шараға шақырту алды.

Айгүл ОРЫНБАЕВА Суреттерді түсірген Серік МАЙЕМЕРОВ

[gallery td_select_gallery_slide="slide" ids="68119,68117,68123,68118,68120,68121,68115,68122,68124,68125"]