Даланың дара абызы: жүрек кілті – Абай ілімі

Осындай тақырыппен «Абай әлеміне саяхат» клубының облыстық семинары Маршал Әбдіхалықов атындағы мектеп­-гимназияда өтті. Абай ілімін, ғибратты өнегеге толы ойшылдық идеяларын жас ұрпаққа сіңірте отырып, адамгершілік мұраттарға тәрбиелеу, Абай шығармаларын үш тілде еркін айтып, түсіне білуге, мағынасын терең ұғына білуге үйретуді мақсат еткен семинарға облыс түкпірінен әдебиет жанашырлары мен мұғалімдер, оқушы­лар қатысып, тәжірибе алмасты.

Шараға Маңғыстау облыстық білім басқармасынан бас­қарма орынбасары Гүлмира Қасымқызы, қосымша білім беру орталығы басшысының міндетін атқарушысы Жемісгүл Жеткізгенқызы, Түпқараған ауданы білім бөлімінің басшысы Айбаршын Қуанышқалиқызы, басқа да қонақтар қатысып, оң пікірлерімен бөлісті. Сондай-­ақ «Абай әлеміне саяхат» клу­бының негізін салушы, өлкетанушы, абайтанушы, өлкеміздің ақыны Сайын Назарбекұлы арнайы шақырылған шарада өлкемізде, қала берді республика көлемінде Абай шығар­машылығын насихаттайтын жұмыстардың барысына тоқ­талды.

Үш бөлімнен тұратын семинардың алғашқы бөлімі ерекше ұйымдастырылған. Мұнда «Мектеп. Ата­-ана. Оқушы» алтын үштігін біріктіретін тамаша бағдарлама үлгісі көрермендерге сабақ болды. Абай өлеңдерін, әндері мен қара сөздерін от­басы тәрбиесіне енгізіп, бала тәрбиелеуде ерте жастан үй­ретудің маңыздылығы қатысқан үш отбасының негізгі басты идеясы саналды. Атақты тіл тарихын зерттеуші Ғұбайдолла Айдаров ұрпақтарынан Алпановтар отбасы Абай өлеңдерін балаларға тілі шыққаннан бастап үйретудің маңызы зор екен­дігін атап өтсе, ауылдың алтын құрсақ анасы Төреш әженің балалары мен немерелері, яғни Борашовтар жанұясы ба­ланы ес білгеннен бастап, тіпті бесік жырының өзін Абай ән­дері арқылы тәрбие ісінде балаларының жетістіктерінің бәрін де Абай әндерінің «Құлақтан кіріп, бойды алған» әсерлі ғибраттылығымен байланыстырды. Замира ана үш ұлымен «Көзімнің қарасы», «Айттым сәлем, Қаламқас» әндерін құй­-қылжыта шырқап берді. Ал аты мәшһүр сәулетші Демесінов Көпбол ақсақалдың отбасынан бағдарламаға қатысқан Демесінов Жандостың жас отбасы барша көрерменге мәде­ниет пен адамгершіліктің түпкі сыры қара сөздің мағынасы­ның тереңдігінде екенін баса айтты. Бала тәрбиесінде қара­ сөздерді жаттату ғана емес, мағынасын жете ұқтырып, көңіл бөлуге үйрету керектігі сөз болды. Жандос отбасымен бірне­ше қара сөз оқып, өзінің ақындық шабытына ерік беріп, көрер­мендерге тамаша жыр жолдарын сыйға тартты.

Семинардың ІІ бөлімі – «Бала Абай. Дана Абай. Дара Абай» сахналық қойылымы. Барша көрермендердің асыға күткен бөлімі де осы болатын. Сахналық қойылымға көркем­дік жағынан сценарийіне жетекшілік еткен мектеп­-гимназия мұғалімдері Тұрғанбаева Гүлшарипа мен Рахиева Айжанның еңбектері зор. Сахна мәдениеті, образдардың сомдалуы, оқиғалар байланысы, көркемдік, мағыналық үндестік – бәрі­-бәрі шынайылықпен жауапкершілікпен көпшілікті тәнті етті.

Абай өлеңдері мен қара сөздерін үш тілде жатқа оқыған бір топ оқушылар – Мерекеқызы Ақмаржан, Сираж Айбек, Дюй­салиев Бекарыс, Қаршығаева Айнұр, Жүсіп Ақерке және Жадыра Кенжеқызы, Қуаналиев Ерлан, Борашов Салауат сынды мұғалімдер де ерекше есте қалды. Қонақтар «Абай әлеміне саяхат» клубы жұмыстарымен танысып, этноауыл­дан дәм татты, мектеп мұражайымен, мектеп өмірімен та­нысты. Семинар бағдарламасы үлгілі деп бағаланып, оңды пікірлерге жалғасты, -­ дейді шараны жүргізген Маршал Әбдіхалықов атындағы мектеп-­гимназия мұғалімі Көшербай Тілектес.

Өз тілшімізден

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.