Тұщықұдықта Сəттіғұл Жаңғабылов мектебінің 90 жылдық мерейтойы өтті

«Еш уақытта мектеп пен ауылды бір-бірінен бөліп қарауға болмайды. Мектеп – ауылдың шамы. Ал шамның шүйшесі күйелеш, білтесі соқыр болса, онда ауылдың сыртқы ажар, ішкі берекесі қандай боларын болжай беруге болады...», - деп мектеп тойына арнаған алғы сөзін ақын Светқали Нұржан осылай қорытындылады...

Жақында Тұщықұдық ауылында білім ұясы Сəттіғұл Жаңғабылов атындағы орта мектептің 90 жылдық мерейтойы өтті. Мерейлі күнге жиналған қонақтардың дені - облысымыздың түпкір-түпкірінде сан салада еңбек етіп жүрген мектеп түлектері. Жан-жақтан білім алған алтын ұя мектебіне асыққан түлектерді кең де салтанатты дəлізде өнерпаз оқушылар күмбірлеген күйімен қарсы алды. Қонақтар мектеп музейінде өткен күндерге шегініс жасап, білім ұясының тарихымен, Сəттіғұл ақынның шығармаларымен танысты.

Мектептің негізі 1928 жылдың аяғы мен 1929 жылдың басында қаланған. 1928-1929 жылдары сегіз арыс Адайдың Құнанорыс ауылынан шыққан, сол кездегі ең сауаттылар қатарына жатқызылған Мақтанов Саржан алғашқы мұғалім болып, шəкірттерге білім берген. Ең алғаш мектеп - 1929 жылы Айдар Ишан атаның өз үйі. 1930 жылы колхоздың кеңсесі, пошта үйі, 1931 жылы Теппенің Сорқұдығындағы Әлжан деген кісінің тас үйі, кейін Нəріп молданың мешіті болды. 1932-1933 жылдары Ақшақұдықтағы Ержан қазіреттің медрессе үйінен балалар білім алды. 1934 жылы Айдар Ишан мешітінің жанынан жаңа мектеп салынып пайдалануға берілді. Сауат ашуға ниет білдірген ауыл балаларын ыңғайы келген жерге оқытып, қайтсем де көкірек көзін ашып, əріп үйретемін деген сол кездегі ұстаздардың ерлігіне сүйсінді қонақтар.

1958 жылы жалпы орта білім беретін мектеп болып іргесін бекітті де, алғашқы түлектеріне аттестат бере бастады, кейін 1976 жылы Тұщықұдық ауылының тумасы, халық ақыны Сəттіғұл Жаңғабыловтың есімі берілді. Содан бері 90 жылға жуық уақыт бойы талай шəкіртті білім нəрімен сусындатып, биік белестерге ұшырған алтын ұя мектебінің бүгінгі салтанатты жиыны түлектер үшін тым ыстық еді. Білім ұясының ғасырға жуық тарихын қорытындылар тұста Елбасымыздың «Рухани жаңғыру» бағдарламасында аталып өткен «100 жаңа есім» жобасы негізінде «Мектеп түлектерінің энциклопедиясы» жасақталып, баспаға жіберілді.

Шара жаңадан жасақталған Елбасы еңбектерін оқу кабинетінің ашылу салтанатына жалғасты. Кабинеттің лентасын мектеп түлегі, Қазақстан Парламентінің 4-5-шақырылымына депутат болған Г.Сейтмағанбетова мен Маңғыстау ауданының əкімі Ж.Айтуаров қиды.

Сонымен қатар мерекелік шара барысында мектептің астыңғы дəлізінде орналасқан «Ұлағат» ұлттық аймағының лентасын ақын Светқали Нұржан мен ардагер ұстаз Ордалы Қосай қиды. Аналардың аманатындай болған өрмек, ши құрылып тұрды. Мұны көрген аналарымыз өткенге оралып, ши орап, өрмекке отырып, өткен шақтарын еске алысты.

Мектеп алдында түлектер шеруіне жиналып, бірін бірі көзімен де, көңілімен де түгендеген түлектер мектеп оқушыларымен бірге вальс ырғағымен билеп, сонау балалық дəурендерін есіне алды. Салтанатты шара ауылдық мəдениет үйінде жалғасын тапты. Маңғыстау ауданының əкімі Ж.Айтуаров мектеп ұстаздарын ауданның 90 жылдық төсбелгісімен марапаттады, мектепке қамқорлық көрсетуге белсенді атсалысқан түлектерге Алғыс хат табыс етті. Өздері білім алған білім ордасының жаңаруына барынша үлес қосқан барлық түлектерге көптің қошеметі ерекше болды.

Құттықтау сөз алған мектеп директоры Бибігүл Себепбай келген қонақтарға алғысын айтып, мерекелік төсбелгіні ардагер ұстаздардың кеудесіне тақты. Облыстық білім басқармасы басшысының орынбасары А.Тұржанова, қоғам қайраткері Г.Сейтмағанбетова мен О.Қосай, Назарбаев зияткерлік мектебі директорының тəрбие жөніндегі орынбасары А.Ихсанова құттықтау сөз арнап, сыйлықтарын тапсырды. Осылайша, бірнеше буын ұрпақ өкілдері бас қосып, өздерін оқытып, тоқытып, өмір əліппесін үйреткен ұстаздары жайлы тебіреніске толы естеліктерін айтты.

Мектеп тарихынан сыр шертетін фильм көрсетіліп, өнерпаздар əн шырқап, би билеп, көпшіліктің көңілін бір серпілтіп тастады. Осылайша қилы замандардан қабырғасы сөгілмей аман өтіп, талай тарланбоз тұлғаларды түлеткен Сəттіғұл Жаңғабылов мектебінің 90 жылдық торқалы тойы жоғары дəрежеде аталып өтті.

Айгүл ЖЕКСЕНОВА, С.Жаңғабылов атындағы орта мектептің мұғалімі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.