Студенттер сазгер Көмек Ыбыраевпен кездесті

«Жас Отан» жастар қанаты мүшелері мен студент жастар жазушы, балалар ақыны, әуесқой сазгер Көмек Ыбыраевпен еркін отырып әңгіме-сұхбат құрысып, сұрақ-жауап алысты. Еркін әңгіме барысында алдымен кеш иесіне сөз берілді.

- Мен Шайыр деген жерге жақын Тиген дейтін кішкентай ауылда дүниеге келген осы жер­дің тумасымын. Руым Жеменей, оның ішінде Мырзагелді. Таушықта оқыдым, Бейнеу жақта оқыдым. Бала кезден әдебиетке әуестігім күшті болды, бірақ бала кезімізде тірі ақын­-жазушыны көргеніміз жоқ. Тек бір жолы Маңғыстауға Төлеген Айбергенов пен Шәмші Қалдаяқовтың келгені бар.

Өсе келе өлең жаза бастадым. Ол кезде туған жер, табиғат, Отан тақырыбына жазамыз. Хан, би­байлар туралы жазуға болмайды. Ең бірінші өлеңім 6-­сыныпта республикалық газетте жарық көрді. Содан бастап шығармашылық жұмысым әлі күнге дейін жалғасып келеді.

Екі­-үш оқуға талаптанып, ақыры сәті түсіп, Шымкент мәдени­-ағарту институтынан білім алдым. Мектепте бала­ларға ән-­саз сабағынан сабақ бердім. Шәкірттермен жұмыс жасағасын балаларға арналған өлең, баллада, хикаяттар жаза бастадым.

Бес балам – екі ұл, үш қызым бар. Бір қызым Москвада тұрады, бір қызым Алматы жақта, бір қызым осында тұрмыста. Бір ұлым бөлек тұрады, кенже ұлым қолымда. 1977 жылдан шығармашылықпен үзбей айналысып келе жатырмын. Соның нәтижесінде 20 кітабым шықты. Одан бөлек – 65 ән, 37 күйім бар.

Алматыда тұрақтап қалғанымда, мүмкін тағдырым басқаша болар ма еді? Бағым жанар ма еді?! Спорт, өнер саласынан қабілеті бар балалар ертерек шұғылданғаны дұрыс. Құдайға шүкір, жақсы келе жатырмыз. Талай халықаралық байқаулардан жүлде алдым, – деп сыр шертті жазушы өз өмі­рі туралы.

Кезінде шығармашылығына Қадыр Мырзалиев, Әбіш Кекілбаев сынды классиктер жылы пікір білдірген Көмек Ыбыраев жастармен кездесуінде қазіргі жас сазгерлер туралы ойын айтты.

– Қазір сазгер көп. Кейбіреуінің мың әні бар. Сөзінің мағынасы солғын, кейбірі тыңдауға ұят, сазының  әуені әлсіз, сондай әуесқой сазгерлер көбейіп кетті. Солардың шығармашылығын тексеріп, сарапқа салып отыратын мемлекеттік комиссия жоқ, – деді ақын.

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.