Түпқараған аудандық кітапханасында коворкинг орталығы ашылды

Енді кітапханаға кітап оқу үшін ғана емес, басқа да қызықты нәрселерді көріп, қолдану үшін де баруға болады. Мұнда тегін ғаламтор желісін пайдалана аласыз, өзіңізге ғаламторда ұнаған нәрсеңізді баспадан шығара аласыз.

Ең қызығы – дос, таныста­рыңызбен кітапханада кездесу ұйымдастырып, шахмат, шашка сияқты ойындарды да ойнай аласыз. Себебі мұнда коворкинг орталығы қосымша жұ­мыс жасайды.

Барлығы да кітапханаға ке­летін тұрғындардың көңілінен шығу үшін жасалынған дүние десек, сенесіз бе? Тек кітап қоры сақталған орын ғана болмай, кітапхананың бос уақытты тиімді өткізетін және шы­ғармашылықпен айналысатын алаң ретінде танымал болуын қалыптастыру, заман ағымы­нан қалыспай өзгерту «Нұр Отан» партиясының баста­масымен еліміздің барлық өңі­рінде қолға алына бастаған. Түпқараған ауданының орта­лықтандырылған кітапханасында да осындай ор­талықтың ашылуы салтанатты түрде аталып өтілді. Кітапхана директоры Алтын Таңатарова коворкинг орталығын үш аймаққа бөлінген деп таныстырды.

– Жұмыс орын­ интернетке қосылған компьютер (сканер, принтер, скайп), семинар, тренингтер өткізетін зал, пайдаланушылардың жайлы жағдайда тегін ин­тернет желісіне шығу мүмкіндігі­ WI­FI аймағы, ерік­тілердің бос уақытын қызықты өткізуіне арналған орындар бар. Келушілер қалауы бойынша ойын ойнап теледидар көріп, немесе қалауы бойынша шай мен кофеге де тапсырыс бере алады. Орталықта барлық санаттағы келушілерге жағдай жасалған, - деп толық­тырды.

«Коворкинг» деген сөз ағыл­шын тілінен аударылғанда бірге жұмыс істеу деген мағынаны білдіреді екен. Коммуникативтік алаң деп айтуға болатын орта­лықта жасына қарамай үлкенге де, кішіге де қызықты дүниелер бар екенін айтып өттік. Осындай шығармашылық үйлесім мен дизайнды кітапханашылар бір­лесіп, өздері жасапты.

– Жай кітап қоры сақталған орын емес, коворкинг кітапхана болған орталықтың жаңашыл үлгісі қызықтырса, келіп көріңіз, қызметімізді пайдаланыңыз, ­- дейді ұжым қызметкерлері.

Клара МЕҢДІБАЙҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.