Жаңаөзен - облыс бойынша ҰБТ қорытындысынан 1-орында

©

Жаңаөзен қаласының әкімі Әділбек Дауылбаев мектеп бітіруші түлектермен кездесті. Салтанатты жиында қала басшысы жас түлектерге сәт-сапар тілеп, «Алтын белгі», «Үздік аттестат» иегерлерін марапаттады.

Биыл Ұлттық бірыңғай тестілеу нәтижесінде Жаңаөзен қаласы үлкен жетістікке қол жеткізіп, 91,5 орта ұпай көрсеткішпен облыс бойынша бірінші орынға шықты. Тестілеуге 19 мектептен 967 оқушы қатысып, оның 406-сы 100-ден жоғары ұпай жинады. Жаңаөзендік түлектер арасында ең жоғары 136 ұпайды мектеп-лицей оқушысы Ерсұлтан Рахметұлы көрсетті. Қала басшысы білім бәсекесінде оза шауып, көш бастаған үздік түлектерге алғысын білдіріп, 33 түлекке «Алтын белгі» төсбелгісін тағып, 35 мың теңгелік ақшалай сертификат табыстады. Сондай-ақ, Республикалық ғылыми жоба, пәндік олимпиадалар, ой-өріс марафондары, Президенттік олим­пиада жеңімпаздарын, білімді жас ұрпақты тәрбиелеудегі үлестері үшін үздік түлектердің ата-аналарын Алғыс хатпен мара­паттады. «Абай атамыз «Сен де бір кірпіш дүниеге, кетігін тап та бар қалан» дейді. Ұлттың үміті - жас ұрпақ сіздерсіздер! Саналы, білімді, Отанын сүйетін жастары бар елдің еңсесі биік болады. Енде­ше, үлкен өмір сынында үкілі үміт пен жоғары сенімді ақтап, биік белестерді бағындыра беріңіздер», - деген тілегін жеткізді Әділбек Құлынтайұлы.

Өз кезегінде жастар атынан мектеп-гимназия түлегі, «Алтын белгі» иегері Амалбек Сәрсенов ұстаздарына алғыс айтса, ата-ана­лар атынан Бектұрған Өтегенов жастарды өміріндегі маңызды сәтпен құттықтап, құрмет көрсетіп жатқан қала әкімдігіне ризашылығын білдірді.

Айжан НАСЫРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.