Шетпелік «Алтын белгі» иегері ҰБТ-да 136 ұпайға ие болды

©

Он ойланып, жүз толғанған оқушылар он бір жыл бойғы білім дәрежесін көрсетер ҰБТ сынағынан да өтті. Биылғы Ұлттық бірыңғай тестілеуге Маңғыстау ауданындағы мектеп бітірушілердің 95 пайызы, яғни 404 бітірушінің 386-сы өтініш берген болатын. 21 маусым күні өткен ҰБТ-ға 386 оқушы түгелдей қатысты. Б.Жұмалиев атындағы орта мектепте өткен сынаққа қатысушыларға Маңғыстау ауданының әкімі Ж.Айтуаров сәттілік тілеп, әр қайсысы бір-бір мемлекеттік грант иесі болуларына тілектестік білдірді.

Тестілеу қорытындысы бойынша орта ұпай 89 пайызды құрады. Алдыңғы бестіктен Шетпе гимназиясы, Шетпе лицейі және Қаратөбе, С.Жаңғабылов, А.Өтепбергенов атындағы орта мектептер көрінді. Оқу жылын «Алтын белгі», «Үздік аттестатпен» бітірген 26 оқушы жоғары нәтиже көрсетті. Ең жоғары 136 балды Шетпе гимназиясының оқушысы, «Алтын белгі» иегері Ержан Жанжігітов жинады.

Жоғары оқу орнына түсудің шектік деңгейінен 40 мектеп бітіруші өте алмады. Бұл оқушылар осы жылдың 15-19 тамыз аралығында қайта өтетін ҰБТ-ны тапсыруға болады. Өңірдегі өресі кең 148 бітіруші 100 және 100-ден жоғары ұпай жинады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.