Қарақияда келіндер сайысы өтті

Жуырда Маңғыстау облыстық ішкі саясат басқармасының тапсырысы бойынша «Шаңырақ» қоғамдық қорының ұйымдастыруымен №6 орта мектептің акт залында «Пай-пай, қазақтың келіндері-ай» атты байқау өтті.

Сайысқа №6 орта және №9 бастауыш мектеп мұғалімдері қатысып, өзара өнерлерін көрсетіп, сынға түсті. Қызметте шәкірт тәрбиелеген ұстаздың бірі болса, өмірде бір әулеттің келіні болып жүрген ұс­таздар қазақ келініне тән құндылықтарды құрметтеп, инабаттылық пен ибалылықты, іскерлік пен ептілікті дә­ріптеді.

Қатысушылар байқау шарттары бойынша алдымен өздерін таныстырып өтті. Бұдан соң өнер бәйгесімен қоса күнделікті тұрмыста қазақ келінінің атқаратын қыз­меттерімен де сынға түсті. Қолөнер бұйымдарын жасаудан ұршық иіру, ұлттық та­ғамдарды дайындау, сондай-­ақ салт-­дәстүр мен ырым-­тыйымдарға байланысты сұрақтарға тұшымды жауаптарын бере отырып, ұлттық киім үлгілерін көрсетті. Сәні мен салтанаты жарасқан келіндер сайысында әділқазылар алқасының ше­шімімен барлық сыннан сүрінбей өткен №6 мектептің бастауыш сынып мұғалімі Ш.Тоқтасынова бас жүлдеге ие болды. Сонымен қатар қазақ тілі және әдебиеті пәні мұғалімі А.Қызылғұлова 1 орын, математика пәні мұғалімі Г.Биғожаева 2 орынды қанжығасына байласа, №9 бастауыш  мектеп  мұғалімі  Ә.Тілеубаева 3 орынға қанағаттанды. Бәсеке соңында түрлі аталымдар бойынша «Үздік келін» деп танылған жеңімпаздарға сый-­сияпаттар табысталды. Көпшілік көңілді күймен тарасты.

Майра ТӨЛЕУОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.