"Нұр Отан" партиясының аудандық филиалында штаб құрылып, Президент сайлауына қызу дайындық жүріп жатқан сәттер еді.
Сол күні штабтағы түнгі кезекшілікке бекітілген күнім болатын. Аталған орынға белгіленген сағаттан бұрын жеттім. Демалыс күні болса да партия қызметкерлері мен сайлауға жауапты кісілер әлі өз орындарында екен. Ауылдағы сайлауалды жұмыстармен сол уақыттағы Басқұдық ауылының әкімі Нұфтулла Қаржаубаев пен әкімдіктің бір өкілі де келіп дәлізде әрлі-берлі жүрді. Ол кезде газеттің редакциясы - партияның аудандық филиалы ғимаратында. Кезекшілігімнің уақыты жеткенше редакциядағы өз орнымда материал жазып отырған ем. Қараторы бір жігіт келіп, Амал, Наурыз мерекелерімен құттықтап, көрісті. Келген бұйымтайы бойынша, электронды поштамен облысқа сайлау туралы ақпарат жіберуі керек екен. Жіберіп, өзі де хат күтіп біраз отырып қалды. Тілшілер қауымының қашан да кейіпкер іздеп жүретіні белгілі емес пе, оның да "тамырын" басып көрген едік. Сөзді қиыстыра, астарлата сөйлеп, қазақи тәрбиемен үлкендерден ұлағат алып өскені көрініп-ақ тұр. Қарапайым бұқарадан түрлі деңгейдегі билік басшыларына дейін, түрлі сала өкілдерімен сұқбаттасып, ауыз ашуынан деңгейін байқап қоятын біз үшін бұл жігіт осал еместей көрінді.
Сонымен халықтың тарихи таңдау жасайтын күні де жеткен-ді. Өз тапсырмамызға сай ертелетіп Басқұдық ауылындағы сайлау үчаскесіне бардық. Алдымыздан тағы сол жігіт шықты. Өзі бұл ауылдың тұрғыны емес. Тек әкімдіктің қызметкері демесең, сайлауға бекітілген жауапты кісілердің қатарында да жоқ. Тұрғындардың белсенділігіне бір кісідей-ақ қуанып, ауыл әкімімен бірге Басқұдықтағы әрбір сайлау үчаскесін аралатты.
Содан соң ол біздің меншіктен тыс тілшімізге айналды десек те болады. Басқұдықтағы жиналыстарда бірнеше рет суретке түсіріп жүргенін көзіміз шалған. Ол суреттерді біздің де пайдаланған кездеріміз көп болған. Қатыса алмаған басқосулардың ақпаратын да алып отыратынбыз. Соған қарай оны ішкі саясатқа жауапты маман ба деп қаласың. Жоқ. Әкімдікте ауыл-шаруашылығы және статистикалық есептер, коммуналдық шаруашылық, жер қатынастары бойынша бірнеше сатылардан өткені болмаса, бұл бағытта "жұмыстанып" көрмепті. Оны коммуналдық салада да бір-екі рет әкімдіктің жылы бөлмесінен тыс жердегі жұмыс үстінде кездестірдік. Бұл нөсер жауын жауып, аудандағы кей елдімекен көшелерін су басқан жылы болатын. Биліктенмін деп қолды қалтаға салып, бір бұрышты паналап тұрмай, суық су кешіп жүр екен. Қолда күрек, топырақ жайып жатқан жерінде жолықтырдық. Енді бірде ауыл медициналық мекемесінің алдына құм төсеп жатқан трактордың соңынан жүріп, әр жерін аяғымен басып, тексеріп жүргенін көрдік. Мұнысына "Тракторды да қатайтып жүрсің бе?!" деп қалжыңдаған да едік.
Ол бұған дейін Басқұдық ауылы әкімдігінің бас маманы болып қызмет етіп келген, биыл ауыл басшылығына сайланған түбектегі ең жас әкім Өсер Тлепов еді. Өсер Тоқтағанұлы 1989 жылы 1 желтоқсанда Таушық ауылында туған. Әскери борышын шекара қызметінде өтеген. 2011 жылы Ақтөбе қаласынан Қ.Жұбанов атындағы университетті есеп және аудит, 2017 жылы Маңғыстау гуманитарлық университетін заңтану мамандығы бойынша тәмамдаған. 2010 жылдан бері "Хоум Кредит Банк" АҚ-та несие жөніндегі маман, "Каспий Құрылыс Транс Сервис" ЖШС-де менеджер еңбек баспалдақтарынан өтіп, Басқұдық ауылы әкімдігіндегі жұмысын 2013 жылы бастаған.
Өсерді елін сүйген ел баласы десек артық болмас. Енді оған мұны дәлелдеуге тағы да бір мүмкіндік туып отыр. Айтуынша, Тұңғыш Президент күні туғаны бұл міндетті орындауды еселей түспесе, кемітпек емес. Өйткені оған 30 мыңға жуық тұрғыны бар бүкіл бір ауылдық округтің - Басқұдықтың тізгіні тапсырылған. Тамыз айындағы ауыл әкімін сайлауда депуттаттардың басым дауысын жинап, ауыл әкімінің міндетін уақытша атқаруға бекітілген еді. Қазан айының 17-нен бері әкім болып тағайындалды. Өзі көп балалы жанұядан шыққан. 5 ұл, 1 қыздың ең кенжесінің бірі - Аман есімді егіздің сыңары екен. Жастайынан жетімдікті де көріпті. 9 жасында әкесі Тоқтаған Тлепов өмірден өтіп, тұрмыстың бар тауқыметін тарта жүріп балаларын аяқтандырған анасы Жаңылхан Сейілханованың тәрбиесінде өскен.
- Бәрімізге белгілі ата-бабаларымыздың жылдар аңсаған арман-мұраты Тәуелсіздікке қол жеткізу болатын. Міне, біз оған жеттік. Одан кейін еліміз өз алдына қаншама белестерді бағындыруды мақсат етіп қойды. Қазір біз сондай жетістіктердің қызығын көріп жүрген ұрпақтармыз. Сондықтан соған сай еңбектеніп, елімізді өркендетуге үлес қосуға тиіспіз. Менің бұл міндетті мемлекеттік қызметте жүріп орындау мүмкіндігім болғанына қуаныштымын. Өйткені бұл менің елім, мамандығым - арманым. "Өмірлік позицияның не?" дегенде, "Күніне жоқ дегенде бір адамға жақсылық жасау" деп Мұқтар Шаханов айтпақшы, сол арманға күніне кем дегенде бір адамға пайдамды тигезе отырып жетсем, онда мен бақытты болар едім. Сондай-ақ мені тағы бір нәрсе қуантып, жұмысқа жігер береді. Ол - туған күнімнің Тұңғыш Президент күнімен тұспа тұс болуы, - дейді Өсер Тлепов.
Жас болса да бас бола білген Өсер, міне, осындай. Ауданда одан басқа да елдің қамы үшін күн демей, түн демей абыроймен өз жұмысын орнықты атқарып жүрген жастар да, елі үшін туған ел азаматтары да баршылық. Олар әрдайым біздің назарымызда. Көзге түсіп-түспей, ойда болса да, баспасөз беттерінде жария болмай жүргені қаншама?!.
Шахида ЖҰМАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
