Ажырасуға ынталылар санының артуы алаңдатады

©

Анасының мейірім жылуын сезіп, асқар таудай әкесінің қамқорлығын көріп өскен баладан бақытты бала жоқ шығар. Отбасының құндылығы азайып, ар-ұят, намыс, ождан секілді қазақ халқы жаннан қымбат санаған қасиеттер кеміп, қоғам санасы уланғаны ащы шындық. Соның салдарынан бүгінгі қоғамда жетім-жесір, жауапсыз әке, «көкек ана» көбейіп, бұл мәселе қазіргі уақыттың асқынған дертіне айналды.

Қырық жыл қырғын болса да, ажал жетпей шаңырағын шайқалт­паған әкелер, тағдырдың қанша тауқыметін көрсе де мойымай, баласын мойынына салып жүріп жеткізген аналар көп еді бұл елде. Өкінішке орай, тағдырдың ыстығы мен суығын бірге көтеретін жандар азайды. Мәселен, Маңғыстау об­лысында жыл басынан бері – 2727 неке заңдастырылған, осы уақыт ішінде – 872 неке бұзу дерегі тір­келген. 2016 жылдың осы кезеңі­ мен салыстырғанда некенің бұзылу дерегі 27­-ге артқан. Қаңтар­-шілде айларында 10 мың 814 сәби дүние­ге келген.

Мемлекетіміздің шағын мем­лекеті саналатын шаңырақтың шайқалуына әртүрлі жағдайлар себеп болуы мүмкін. Күнделікті қызмет барысында кездесетін де­ректерге тоқталсақ, отбасында перзенттің болмауы, түсінбестік, мінездердің жараспауы, ішкілікке салыну, зорлық-­зомбылық, тұр­мыстың тауқыметі және тағы да басқа себептерге байланысты неке бұзу деректері орын алған. Ата­-бабаларымыз айтқандай, орынсыз қызғаныш орға жығатынында ес­тен шығармауымыз қажет. Мұндай жағдайлардың соңы кейде қанды оқиғаменде аяқталып жатады. Не­ке бұзу ісін қарау барысында ажырасу себебін сұрағанда әйелдердің көбі жолдасының табыс таппай­тынын, жатыпішер жалқау екенін, жұмысқа орналаспайтындығын алға тартады. Егер ер азамат отба­сын құруға, бір жанұяны асырау­ға дайын болмай, соқыр сезім­ мен үйленер болса, оның соңы ажырасуға әкеп соғуы мүмкін. Се­бебі әйелзаты ер адамға арқа сүйеп, қамқорлық пен мейірім күтеді.

Некенің бұзылуына әкеп соға­тын осы аталған жағдайлардан басқа да өте көп себептер бар.

Қоғамның бір бөлігі саналатын отбасының берекесі қашпай, іші жылулыққа толы болуы ер мен әйелге теңдей байланысты. Сол се­бептен жаңа отау құратын жастар ерінбей еңбекпен айналысып, шаңырақтың шырайын келтіру үшін бірге жұмыстанса ажырасу да, жетім балалардың саны да аза­яр еді.

Райхан  ЕРЖАНОВА,

Ақтау қалалық №2 сотының судьясы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.