Ақтауда «Қаракөл көлі» экологиялық-ағарту орталығының тұжырымдамасы жасалды. Осыған орай «Қаракөл көлі» сулы-батпақты алқабын тұрақты пайдаланудың әлеуетті мүмкіндіктері» атты тақырыпта дөңгелек үстел өтті, - деп хабарлайды mangystaumedia.kz сайты.
Алдымен «Атамекен» өңірлік кәсіпкерлер палатасының директоры Рашит Мұстапаев мәселенің өзектілігіне тоқталып, қатысушыларды дөңгелек үстел жұмысына белсенді қатысуға шақырды.
«Дөңгелек үстел тақырыбы әртүрлі тараптардың жалпылама экологиялық мәдениетті қалыптастыруына және бизнес-қауымдастықтың табиғи ресурстарға экологиялық жауапкершілікпен қарауына сәйкес келеді. Қаракөл көлі – Маңғыстаудың көркі және қазынасы, біздер оны адамның, табиғаттың игілігіне тұрақты пайдаланудың барлық мүмкіндіктерін қарауымыз керек. Бірінші кезекте экологиялық туризм нысаны ретінде», – дейді Рашит Тұранұлы.
Жиын барысында Орта Азия Рамсар өңірлік бастамасы (ОА-РӨБ) үйлестіруші комитетінің мүшесі, «Табиғи орта» Батыс Қазақстан үкіметтік емес ұйымдары өңірлік ассоциациясының кеңес төрағасы Әділбек Қозыбақов пікір білдіріп, ұсынысын айтты.
«Осы сулы-батпақты алқапта жылдың әртүрлі мезгілдерінде суда жүзетін және су маңы құстарының 175-тен аса түрі бар. Олардың 20-дан астамы Қазақстанның Қызыл кітабына енгізілген. Олар кіші аққу және сұңқылдақ аққу, бұйра және қызғылт бірқазандары, қоқиқаз, қарабай, аққұйрықты субүркіт, үкі және т.б. Қаракөлдің экологиялық туризм нысаны ретінде дамуы үшін және оны мекендеушілерді сенімді қорғау, оның ішінде соңғы кезде құстарды дронмен үркітуге құмар азаматтардан қорғау мақсатында, экологиялық-ағарту орталығын ашып, экологиялық соқпақтарын салып, ерекше қажеттіліктері бар тұлғалар үшін ыңғайлы жабдықталған бақылау мұнараларын және құстарға арналған жемдеу алаңдарын орнату керек», – дейді ол.
Әділбек Қозыбақовтың айтуынша, егер осы орталықта ақылы экскурсиялар ұйымдастырса, уақыт өте өз-өзін қаржыландыруға мүмкіндік береді.
Айта кетейік, облыстық табиғи ресурстар және табиғат пайдалануды реттеу басқармасы басшысының орынбасары Есенқос Әділбаев Қаракөлдің жағдайын экспресс-бағалау бойынша жұмыстарына қатысқан болатын. Нәтижесінде ҚР Экология, геология және табиғи ресурстар министрлігі Орман шаруашылығы және жануарлар дүниесі комитетіне Маңғыстау әкімдігінен Қаракөл көлін Рамсар халықаралық мәні бар сулы-батпақты алқаптарының тізіміне номинациялау керектігі жөнінде хат жолданды.
Шараға қатысқан Маңғыстау облысы табиғи ресурстар және табиғат пайдалануды реттеу басқармасының басшысы Дүйсен Құсбеков балық шаруашылығын дамыту жөнінде сөз қозғады. Оның айтуынша, алдағы он жылдық жоспарға сәйкес, 2030 жылға дейін аймақта 100.000 тонна балық өсіру жоспраланып отыр.
Оқушыларды «Қаракөл сақшылары» еріктілер экопатруль жасағы құрамында сулы-батпақты алқаптың құстарын санап, аумағын санитарлық тазарту іс-шараларына тарту бойынша Ақтау қаласы Химия-биология бағытындағы Назарбаев Зияткерлік мектебінің экология бойынша координаторы Бақытгүл Жақсылықова қысқаша баяндады.
Сонымен қатар «Ecojer» республикалық ассоциациясының Маңғыстау облысы бойынша өңірлік экологиялық кеңес төрағасы Қажымұрат Хайрушев Қаракөлді сақтау және тұрақты пайдалану бойынша бастамаларды жан-жақты қолдауға дайын екендігін жеткізді. Ұсыныс та айтылды.
Мәселен, ҚР ЭГТРМ ОШЖДК-не Үстірт қорығы мен аумақтық инспекцияға «Табиғи орта» ассоциациясы Биоресурстарды қорғау бойынша қоғамдық инспекция өкілдерімен бірлесіп, жыл сайын қыркүйек айынан бастап мамыр айының аяғына дейін демалыс, мейрам күндері Қаракөл көліне рейдтерге шығып тұруды тапсыру ұсынылды. Уәкілетті органға, Қарақия-Қаракөл мемлекеттік зоологиялық қаумалының төлқұжатына Қаракөлдің үстінен ұшқышсыз ұшатын аппараттарды (дрон, квадрокоптер) 1 шақырым биіктіктен төмен ұшыруға тыйым салынуы жөнінде талап енгізу ұсынылды.
Облыстық білім басқармасына дарынды балаларға арналған мектеп-интернаты мен «Білім-Инновация» лицейі оқушыларының, облыс көлеміндегі колледждер мен жалпы білім беру мектепте оқитындардың экологиялық мәдениетін қалыптастыру мақсатында Қаракөл көліне экологиялық танымдық экскурсиялар ұйымдастыру бойынша мүмкіндіктерін қарастыру ұсынылды.
Есенов университетіне экологиялық және биологиялық мамандықтары студенттерінің, магистранттарының және докторанттарының Қаракөл көлін ғылыми-зерттеу және дала практикасы алаңы ретінде пайдалану ұсынылды.
Әлеуетті демеушілерге «Қаракөл көлі» экологиялық-ағарту орталығын ашу және қызметін дамыту бойынша «Табиғи орта» ассоциациясымен ынтымақтастық орнату ұсынылды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
