Түпқарағанда 90 жастағы қария коронавирустан жазылып шықты

Кеше Форт-Шевченко қаласының 90 жастағы тұрғыны Атабай Азмағамбетов коронавирустан емделіп шықты, деп хабарлайды mangystaumedia.kz.

Атабай ақсақал аталған бөлімге коронавирус инфекциясы, өкпенің екі жақты қабынуы диагнозымен 24 мамыр күні түскен.

Түпқараған аудандық орталық ауруханасының бас дәрігері Гүлшат Шалабаева ақсақалдың қазіргі жағдайы туралы айтып берді.

«Атабай ақсақал 20 мамырдан бастап ауырған. Бастапқыда денесінде әлсіздік белгілер пайда болған. Жанұясы бізге хабарласқаннан кейін, дәрігерлер шұғыл түрде үйіне барып, денсаулығын тексерді. Ақсақалдың өкпесін тыңдау және компьютерлік томография қорытындысына сәйкес науқастың өкпесінің 35 пайызы зақымдалғаны анықталды. Ақсақал ауруханаға 24 мамырда қабылданды. Бүгін дерттен айығып, отбасымен аман-есен қауышып отыр.

Тұрғындарға коронавирустың негізгі белгілері әлсіздік, дене қызуының көтерілуі, жөтелдің пайда болуы, іштің өтуі мен терлеу екендігін айтқым келеді. Мұндай белгілер пайда болған жағдайда дереу дәрігерлер көмегіне жүгінуге шақырамын. Соңғы тәжірибелер көрсетіп отырғандай, жөтел белгісі жоқ, алайда денесінде әлсіздік қана байқалған азаматтардың екі өкпесінің бірдей қабынғаны анықталып отыр. Сондықтан да, тұрғындарды денсаулықтарына бей-жай қарамауға, санитарлық талаптарды сақтауға, мейлінше вакцина қабылдауға шақырамын», деді ол.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.