Құрықта тойхана жабылып, орнына шағын маркет ашылды

Қарақия ауданының орталығы Құрық ауылындағы "Каспий" мейрамханасын бұл ауылдың жасы да жасамысы да біледі. Өйткені, бұрын "Каспийсіз" той-думан өтпейтін. Өкінішке орай, елдегі эпидемиологиялық ахуал тойдың ауылын алыстатты.

Міне, сол "Каспийіміз" енді тойхана емес! Бүгіннен бастап, қызметін өзгертіп, ауыл тұрғындарын азық-түлік сияқты тауарлармен қамтитын шағын маркет болып өзгерді.

Жаңа кәсіптің салтанатты лентасын Бақтыгүл Қалжанова қиып, шашу шашты. Ал, аудандық кәсіпкерлік және өнеркәсіп бөлімінің басшысы Алия Әбдіхалықова құттықтау сөз сөйледі.

- Бүгін міне, ел тәуелсіздігінің 30 жылдығы қарсаңында тағы бір жаңа кәсіпке куә болып отырмыз. Бұрынғы отбасылық бизнесті жалғастырушы жас кәсіпкер Р.Қалжанов қайта модернизациядан өткізіп, қолға алған «Каспий» шағын маркетінің ресми түрде ашылуымен баршаңызды құттықтаймын, - деді ол.

Аталған сауда орталығы азық-түлік тауарларынан бөлек қолдан дайындалатын өз өнімдерін халыққа ұсынуда.

- Кәсіпті іске қосу үшін жеке кәсіпкер өз қаражатымен қоса мемлекет тарапынан «Еңбек» бағдарламасы арқылы 6 миллион теңге кредит алып, ауыл тұрғындарынан 10 адамды жұмыспен қамтып отыр. Жаңа нысанның жұмыс істеуі өңірдегі әлеуметтік маңызы бар азық-түлік тауарлары бағасының тұрақтылығына және қолжетімділігіне септігін тигізетініне сенімдімін, - деді әкімдік өкілі.

Айта кетейік, қызмет көрсету бағытын өзгерткен отбасылық кәсіпті бұдан былай Рысалы Қалжанов басқарады.

- Шағын маркет сөрелеріндегі тауардың 10%-ы "Каспий маркеттің" өз өнімі. Біз түрлі кондитерлік өнімдер мен салаттарды, бұқтырылған тауық еттері мен нан, торт өнімдерін өзіміз өндіреміз, - деді ол.

Шынар Кендін

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.