Мұнайлы тұрғыны жылыжайдағы көкөністерді гидропоникадан шыққан сумен суарады

Дәулет ауылының тұрғыны Ертай Көптілиев үй жанынан шағын жылыжай салған. Био-вегетарий күн сәулесімен ғана жұмыс істейді, - деп хабарлайды mangystaumedia.kz сайты Қоғамдық коммуникация орталығынп сілтеме жасап.

Тұрғын жылыжайды ақпан айында салған. Аумағы - 28 шаршы метр.

"Жоғарыдағы жылы ауа арқылы жылыжайдағы орташа температураны ұстап тұратын желдеткіш жұмыс істейді. Картоп, қияр, қызанақ, көк бұрыш, құлпынай көкөністерінен бөлек, шпинат, аскөк өсіремін. Қазірдің өзінде бұл өнімдерге сұраныс көп", - дейді Ертай Көптілиев.

Ол алдағы уақытта кәсіпкерлікті қолдауға бағытталған мемлекеттік бағдарламаларға қатысуды ойлайды. Тұрғын қайтарымсыз грант алса, жылыжайды 5 есе үлкейтуді жоспарлап отыр.

Айта кетейік, Ертай Көптілиев бұған дейін асыл тұқымды ұсақ малын гидропоника әдісі арқылы жемдейтін. Енді ол кәсібі
қасына жылыжай жайқалтуды қолға алып отыр. Шаруа малдың қиынан жауын құрттарының көмегімен өнімдерді өсіруге арналған биогумус тыңайтқышын алады. Ал жылыжайдағы өнімдерді гидропоникадан шыққан сумен суарады.

"Малдан шыққан қиды жауын құрттар жейді. 3 айдан кейін биогумус дайын болады. Соған мен егін егемін. Менен ешқандай қаражат шықпады. Үйден шыққан заттарды пайдаландым. Өнімдерді әзірге үйге арнап өсірудемін. Келешекте жылыжайды үлкейту жоспарда бар. Менде мал, гидропоника, жұмыртқа, сүт, қи бар. Енді жылыжайды қолға алсам әмбебап болады. Сырттан тек арпа сатып аламын. Арпадан шөп өсіремін. Шөптен қалған қалдық суға егін егемін. Қалдық сыртқа шықпайды", - дейді Ертай Көптілиев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.