Бұл туралы mangystaumedia.kz сайты Мұнайлы ауданы әкімдігінің баспасөз қызметіне сілтеме жасап хабарлайды.
Мұнайлы ауданына қарасты Атамекен ауылындағы ең өзекті әрі негізгі мәселенің бірі - жер асты суының пайда болуы. Көктем – қыс мезгілдерінде жер асты суының деңгейі көтеріліп, тұрғын үйлерге қауіп төндіруі қиындық тудырып отыр. Осы мәселенің алдын-алу мақсатында МО табиғи ресурстар және табиғат пайдалануды реттеу басқармасы Алматы қаласындағы арнайы ғылыми – зерттеу институтының мамандарымен бірлесіп геологиялық барлау, зерттеу жұмыстарын жүргізген. Нәтижесінде жер асты суларының пайда болуы «Кіші Оймаша» көлінің әсерінен және де елді мекен аумағында осы көлмен байланысты 8 жерде бұлақ көздінің бар екендігі анықталған.
Қазіргі уақытта тұрғын үй алабтарынан шығатын жер асты суларын арнайы су сору құрылғыларының көмегімен құбыр арқылы қауіпсіз аймаққа тасымалдау бағытында жұмыстар жүргізілуде.
Бұл туралы Атамекен ауылдық округінің әкімі Нұрхан Мұстафаев мәлім етті.
«Атап айтқанда, жер асты сулары арнайы орнатылған дренаж жүйелері арқылы тасымалданып, ауыл сыртында орналасқан «Кіші Оймаша» көліне құйылуда. Қолданыстағы дренаж жүйелері Қаламқас, Туған – ел, Көктем және Болашақ тұрғын массивтері аумағында орналасқан. Бүгінгі күні ауылдық округке қарасты Шағала тұрғын массивінің аумағына қосымша 1/бірлік дренаж жүйесін орнату жұмыстары жүргізілуде. Аталған жұмыстар елді мекен аумақтарын абаттандыру үшін жергілікті бюджеттен бөлінген қаражат есебінен іске асырылуда», - деді Нұрхан Мұстафаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
