Аспаз әрі кәсіпкер: Жыңғылдылық тұрғын шұжық дайындап сатады

Жыңғылды ауылының тұрғыны Гүлфайрус Зейнұрова үй жағдайында шұжық жасап, кәсібін дөңгелетіп отыр. Заман талабына сай шағын кәсіптің өнімі бүгінде сұранысқа ие, - деп хабарлайды mangystaumedia.kz Маңғыстау ауданы әкімдігінің баспасөз қызметіне сілтеме жасап.

Ерекше кәсіп түрін қолға алған жыңғылдылық көп балалы ана бүгінде тек шұжық емес жартылай дайын өнімдер, ашытқысыз нан, түрлі тәттілерді пісіреді. «Бастау-Бизнес» жобасын қашықтан оқып, қолынан келетін істі кәсіп қылған Гүлфайрус бұл салаға қалай келгенін айтып берді.

- Үлкен үйміз. Үлкейген атам мен енем, қорадағы мал, үйдегі баланың қамы, қалаберді үйдің келім-кетім қонағы бар дегендей жұмыстан шығуыма тура келді. Тіршіліктің қамымен жүргенде 10 жылдың қалай өткенін де аңғармай қалдым. Өзімнің анам аспаз, бізге бәрін үйретті, бәріне баулыды. Соңғы кездері өзім де біраз ізденіп жан-жақтан білім ала бастадым. Зиянсыз органикалық заттар пісіруді үйрендім. Тынымсыз ізденісімнің арқасында болу керек, шұжықты өз әдісіммен жасап үйрендім. Одан кейін ауылдың келіншектері «дүкен сөрелерінде де экологиялық таза өнімдер жоқ, кәсіпке айналдырып, дүкендердерге шығарсаң алар едік» деп ұсыныс айта бастады. Ойланып жүрдім де, ауылдағы кәсіпкер Б.Оразымбетова қолдау білдіріп, кәсіп қылып бастауға ақыл кеңес берді. Сөйтіп, былтырғы жылдың наурыз айында «Бастау-Бизнес» жобасы бойынша қашықтан оқып, ісімді тәуекел деп бастадым. Мемлекеттің шағын кәсіпкерлікті қолдау мақсатында берілетін қайтарымсыз грантына қатысып, қолдан келетін кәсібімді жалғастырғым келеді, - деді Гүлфайрус Зейнұрова.

Ол биыл Президенттің кәсіп бастағысы келетін жандарға берілетін грант көлемінің ұлғайғанын естіп, қуанғанын да жасырмады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.