Бейнеуде дзюдодан ашық турнир басталды

Бейнеуде қоғам қайраткері, еркін күрестен КСРО спорт шебері Тұмаш Ауданбаевты еске алу мақсатында дзюдодан ашық турнир басталды. Бұл туралы Бейнеу ауданы әкімдігінің баспасөз қызметі мәлімдеді, - деп хабарлайды mangystaumedia.kz cайты.

Жарысқа 2005, 2006, 2007 жылы туған балалар қатысып жатыр.

«Бүгін өтіп жатқан спорттық шара ел аузында жақсы атағы қалған Ауданбай Тұмаш Әбиболлаұлына деген бір құрмет, ұрпақ сабақтастығы деп білейік, құрметті жерлестер! Турнир келешекте спортшыларымыздың жаңа белестерді бағындырып, салауатты өмір салтын сақтап, жастардың дзюдо күресіне қызығушылығын оятады деген сенімдеміз», - деді Бейнеу ауданының әкімі Бейнеубек Әбілов.

Айта кетейік, Ауданбаев Тұмаш Әбиболлаұлы 1943 жылы 10 қаңтарда дүниеге келген. Ол институт қабырғасында еркін күреспен айналысты. 1962 жылдың күзінде алғаш рет еркін күрестен Ашхабад қаласының біріншілігіне қатысып, 57 кг салмақта қала чемпионы атанды. Сол жылы республика чемпионы дәрежесіне жетті.

1963 жылдың күзінде 57 кг салмақта Ашхабад қаласының еркін күрестен екінші мәрте чемпионы атанады. Сол жылы еркін күрестен 1 спорттық разряд нормасын орындады. 1964 жылы Тұмаш Ауданбаев еркін күрестен Түркмен Республикасының құрама командасының мүшелігіне қабылданды.

1965 жылы маусым айында Түркменстан Кәсіподақтарының VIII спартакиадасында еркін күрестен 57 кг салмақта бірінші орын алып, КСРО- ның спорт шебері атағына ие болған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.