Қарақияға «Қазақстан барысы» келді

Өткен сенбіде Қарақия ауданына Азия және әлем чемпионы, "Қазақстан барысының" үш дүркін жеңімпазы Б.Ыстыбаев келді. Барыс палуанды аудан әкімі Қыдырберді Беков қабылдаған соң бірнеше нысанға ат басын тіреді. Құрықта демеушілік негізде бой көтерген спорт залға барып, жаттығу залдарын көрді. Жас спортшылармен сұхбаттасып, естелік суретке түсіп, қолтаңба қалдырды. Бұдан соң мұнай әлеміндегі ең алғашқы терді төккендер, яғни геолог-барлаушылар даңқына арналған мұражайды аралап көрді. Елсізге ел қондырып, тіршіліктің күре тамырын орнатқан мұнайшылар қауымы болса, сол мұнайды қу даладан іздеп тауып, еңбектің көзін ашқан геолог-барлаушылардың қара шаңырағы - құтты Құрыққа келген әр қазақ, осы мұражайға ат басын тіреп, тарих тағлымына тоқталмай кетпейді. Сол дәстүрді жалғастыра келген бәйтерек тұлғалы палуан ұлылық алдында кішілік танытып, ардагерлер еңбегіне өз құрметін білдірді. Сондай-ақ Б.Ыстыбаев "Қызыл жұлдыз" иегері, жауынгер-интернационалист Сәлімжан Әлиевті еске алуға арналған қазақ күресінен V республикалық турнирдің ашылу салтанатына қатысты. Еліміздің бірнеше облысы мен Маңғыстаудың әр аудан, қалаларынан келген жас палуандармен қоса турнирге құрметті қонақ ретінде Азия және әлем чемпионы Бейбіт Ыстыбаев, ауған соғысының ержүрек ардагерлері мен Сәлімжан Әлиевтің қанды көйлек, майдандас достары, туған-туысқандары және спортсүйер қауым қатысты. Турнирді аудан әкімі Кыдырберди Беков, Бейбіт Ыстыбаевтар құттықтау сөзбен ашқан соң, ҚР Әнұраны орындалды. Музыкалық сәлем жолданып, қазақ күресінен белдесетін спортшылар командалары және төрешілер қосыны таныстырылды. Сондай-ақ қаhарман жауынгер атындағы турнирге жиналған көпшілік алдында Қарақия ауданының жас қырандары ант беріп, оларға ардагер ағалар мен аудан басшылары және "Қазақстан барысы" Бейбіт Ыстыбаев галстук тақты. Әсіресе, Бейбіт ағаларының қолынан галстук бұйырған жас қырандардың қуаныштарында шек жоқ. Айта кетейік, дәл сол күні ауданда "Бүкілқазақстандық ағаш отырғызу" акциясы өтіп жатқандықтан, әрі С.Әлиевтің құрметіне, спортшылар даңқына арнап, турнир басталмас бұрын аудандық спорт кешені ауласына ағаш отырғызу рәсімі өтті. Игі рәсімге атақты палуан мен ауданның басшылары, ауған соғысының ардагерлері атсалысты.

Аршын КЕРЕЙ