Жетібайда мұнайшылармен кездесу өтті

Өлке тарихында тұңғыш рет мұнай бұрқағы жарты ғасыр бұрын Жетібайдағы кеніште атқылаған болатын. Бұл еліміздің экономикалық қуаттылығын арттыратын маңызды  оқиға болды.

Мұнаймен тығыз байланысты дамыған өңір тәуелсіздік жылдарында өндірісі өркендеп, шаруашылығы қалыпты дамып келе жатқан аймаққа айналды. Қазіргі таңда Жетібай басында бірқатар кәсіпорындар мұнайгаз игерумен қатар жергілікті халықтың әл-ауқатын көтеріп отыр.

Осыған орай 18 шілде күні Жетібай ауылының мәдениет үйінде Қарақия ауданы әкімінің орынбасары Е.Күмісқалиевтың төрағалығымен Жетібай және Мұнайшы ауылдарында қызмет ететін мұнайгаз және сервистік қызмет көрсететін кәсіпорын басшыларымен Қарақия аудандық жедел штабының көшпелі отырысы өткізілді. Кездесуге облыстық еңбек басқармасының өкілі, аудандық құқық қорғау және жергілікті атқарушы органдардың басшылары қатысты.

Жиында Ержан Көпжасарұлы алдымен өңірдегі жетістіктерге тоқталды. Сонымен бірге мұнайшыларға өңірдің әлеуметтік-экономикалық дамуына қосып жатқан зор үлестері үшін алғысын жеткізді. Кәсіпорындардағы әлеуметтік тұрақтандыруды қамтамасыз ету, өндірістегі атқарылған және алда атқарылатын жұмыстарымен қоса алдағы жоспарларымен танысу - басшылардың басты мақсаты болды.

ТАҒЫ ОҚЫҢЫЗ: Саммиттің арқасында салынады

Кездесу барысында «Жетібаймұнайгаз» ӨФ, «OSK» ЖШС, «ОКК» ЖШС, «ОТК» ЖШС, «Техно-Трейдинг Лтд» ЖШС, «Мұнайтелеком» ЖШС, «Маңғыстауэнергомұнай» ЖШС, Жетібай өндірістік цех басшылары өз кәсіпорындарының хал ахуалы жайында кезекті баяндамаларын жасады.

Елбасы тапсырмаларының нақты орындалуына назар аударуды алға тартқан Ержан Көпжасарұлы жиын соңында Қарақия ауданына 45 жыл толу мерейлі мерекесіне байланысты аудан әкімдігі тарапынан қызу дайындық жүргізіліп жатқанын тілге тиек етті. Жақсылыққа жаны жақын мұнайшыларға аталмыш мерекені атаусыз қалдырмайтынын айтты. Түрлі бағытта салтанатты кештер, спорттық шаралар ұйымдастырылып, бірқатар әлеуметтік нысандар халық игілігіне берілетінін жеткізді.

Майра ТӨЛЕУОВА