Ақынды ардақтаған кеш

Маңғыстаудың қасиетті топырағына кіндік қаны тамған қазақтың көрнекті қаламгері, қоғам және мемлекет қайраткері Әбіш Кекілбайұлының «Қазақтың ақын болмауы мүмкін емес, өйткені әр сөзі бірін-бірі іздеп тауып, құшақтасып, ұйқасып тұрады» деген ұлағатты сөзі бар. Шынында да қазақтың жаны ақын, рухы ақын. Сондай ақындардың бірі - Маңғыстау өңіріне белгілі ақын, білімді де, білікті журналист Есетова Айнахан Ығылманқызы. Ақынның шығармашылығына арналған «Бойтұмар» поэзиялық кеш Ақмарал Талпақованың ұйымдастыруымен «Бейнеу» мектеп-интернатында өтті.

Мақсаты­ - ақын шығармаларын жастар арасында «Рухани жаң­ғыру» аясында кеңінен насихаттау. Ақынның жыр кешінде ақын туралы жылы лебіздер мен мазмұнды әңгімілер айтуға ауыл азаматтары мен аналар және мектептің 8-­11 сынып оқушылары қатысты.

Жыр кеші «Гүлдерайым» бишілер тобының орындауындағы қазақ биімен ашылды.

Поэзия, менімен егіз бе едің?! Сен мені сезесің бе? Неге іздедім? Алабұртқан таңдардан сені іздедім,

Қарауытқан таңдардан сені іздедім,­ - деп ақиық ақын Мұқағали жырлағандай, бір мезгіл сырлы әуенге, жадымызда жаңғырған жыр жолдарына құлақ түрдік. Мектеп оқушылары ақынның өлеңдерінен шашу шашты. Ақынның прозалық шығармасы «Маңғыстау мінез ару­лар» топтамасынан шағын сахна­лық қойылым қойылды. 10 сынып оқушылары Оңғалиева Жұлдыз бен Қалмырзаева Динараның сом­даған образдарының әсерлі шық­қаны соншалық, көрермен қауым көздеріне еріксіз жас алды. Көрер­меннің өлеңге деген қошеметі мен ыстық ықыласынан біз де руханият­қа шөлдеу, жан азығына ұмтылыс бар екенін ұқтық.

«Өлең деген ата­-бабадан қалған асыл мұра, оны біз ұрпақтан-­ұр­паққа жалғастыруымыз керек», - деді ақын апа. «Сыйлағанның құ­лы бол» демекші, ақын жиналған жұртшылыққа ықыласы мен жылы лебізін айтып, кеш соңында көрер­менге «Түйме» атты өлеңін тарту етті.

Қазақ поэзиясында өзіндік қол­таңбасы қалыптасып, ерекше өлең өрнегімен оқырман жүрегіне жол тапқан ақын, білікті журналист Ай­нахан Есетованың өлеңдеріне ән де жазылып жүр. Жыр кешінде Ай­нахан апаның сөзіне жазылған «Ке­лінге өсиет» әнін ауданға белгілі әнші Рысты Кабулова орындаса, Ақмарал Талпақова мен Ақмәрмәр Сұлтанованың орындауындағы «Армансыз күнім болмайды», Оралхан Қамиеваның орындауындағы «Перзент парызы» әндері көпшілік көңілінен шығып, қошеметке ие болды.

Ақын мен сазгердің шығармашы­лығы әншіге олжа деген осы болса керек.

Кеш соңында ақын апаға қо­шамет, құрмет көрсетілді. Кеш­тен кейін Айнахан Есетова мектепте жаңадан жасақталған музей және демалыс аймағымен танысып, өз тілегін білдірді. Мектеп кітапхана­сымен танысып, кітап қорын тол­тыруға атсалысатындығын айтты. Ұстаздар мен мектеп оқушылары ақынға зор алғыстарын айтып, естелікке суретке түсті.

Тартымды өткен бұл шара рухани жаңғыруымыздың бір көрінісі десек жаңылмаймыз.

Айжақсы ЖЕТПІСОВА, биология-химия пәні мұғалімі