Балалар сүйікті ақыны Көмек Ыбырайұлымен кездесті

Дәулет ауылында орналасқан №3 арнайы жалпы білім беру мектебінде қазақ тілі мен әдебиеті пәнінің мұғалімі Сәуле Түгелбаеваның ұйымдастыруымен Маңғыстаудың киелі топырағынан нәр алған ақын, сазгер, балаларға арналған бірнеше кітап авторы Көмек Ыбырайұлымен «Туған жердің түлегі, ұрпақ деп соққан жүрегі» тақырыбында кездесу өтті.

Шара Елбасымыздың «Болашаққа бағдар: рухани жаңғыру» бағдарламасын іске асыру аясында ұйымдастырылды. Мақ­саты – білім алушыларға ақынның туған жер, шынайы патриотизм тақырыптарындағы өлеңдерін насихаттау, Отанға, елге деген сүйіспеншілік сезімдерін арттыру.

Кездесу барысында оқушылар ақынның бірнеше өлеңін нақышына келтіріп мәнерлеп оқыды. Әндерін ән-­саз пәнінің мұғалімі Сәуле Өтегенова, еңбек пәнінің мұғалімі Гүлжанат Тұрмағамбетова, 6­-сынып оқушысы Айдос Ашур құйқылжыта орындады. Ақын, сазгер ағамыздың өмір жолы мен шығармашылығы жөніндегі деректерді оқушылар өз аузынан естіп, аға­мызға өздерінің көкейінде жүрген сұрақтарын қойып, интерактивті тақтадан елімізге танымал әншілердің орындауындағы шығармаларын тыңдады.

Мектеп директоры Ардақ Өтешқызы жүрегі – жыр, пейілі – поэзия деп соққан ақын ағаға өз алғысын біл­діріп, шығармашылық табыс тіледі. Кеш өте әсерлі өтті.

Ж.КАНИЕВА, әлеуметтік педагог

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.