Кекілбаев дүниеге келген Онды ауылының бүгінгі келбеті жайлы

Жүгі нарда, қазаны теңде болып, көшпелі ғұмыр кешкен қазақ халқының құтты мекені – ауыл. Ауыл – халқымыздың бойына нәр құятын алтын бесігі, ұлттық рухтың қуат алар қайнар көзі. «Гүлденсе ауыл, гүлденеміз бәріміз» дегендей, ауыл көркейсе, халық өмірі жақсарады, әлеуметтік жағдайы көтеріледі деген сөз. Әр жылда дамудың жаңа белесіне қадам басқан, жаңару мен жаңғырудың жаңа сатысына көтерілген ауылдың бірі – Онды ауылы. Осы ауылға жақында ғана басшы болған Балтабек Балапанмен болған әңгімемізге ауыл тұрмысын арқау еттік.

- Қаратаудың құт дарыған қойнауы, береке мен шаттыққа толы Онды ауылының іргесі бүтін. Тату­-тәтті ғұмыр кешіп келе жатырған осынау ауылда тұрғындары егемен еліміздің мәртебесін биіктету жолында аянбай еңбек етіп келеді. Онды ауылында бүгінде 236 тұр­ғын үйде 1572 халық тұрады. Ауыл құрамына Бекі, Басқұдық елді мекендері кіреді. Еліміз Тәуелсіздік алған жылдар ішінде осы Онды ауылына келген мен алтыншы әкім екенмін. Осы кезге дейін халықпен тығыз байланыста, қиын­ қыстау кезеңдерде қоян-­қолтық араласа жүріп еңбек етіп, Онды ауылын осындай биіктерге жеткізген Қ.Аманиязов, Ш.Ерғазиев, Е.Манаш, С.Озған, Б.Ізімтаев сынды ауылымыздың біртуар азаматтары дербес дамудың өтпелі кезеңдеріндегі қиындықтар мен сынақтарын еңсеріп, ілгерілеу мен өркендеу жолына шықты. Халық игілігін көздеген мемлекеттік бағдарламалардың алға қойған басты мін­деттері аясында халықтың әл­ауқатын нығайту жолында сенімді түрде алға жылжыды. Ел тәуелсіздігінің 26 жылдығы тарих үшін қысқа мерзім болғанымен, бұл ауыл үшін айтулы кезең. Елбасымыздың жыл сайынғы халқына Жолдауы болашағымыздың бағдаршамына айналып, атқарылар ауқымды істерге тың серпін берері анық. Қазақстанның әрбір аза­маты мемлекет тыныштығын қорғауға, Пре­зидент саясатын қолдап, елдің амандығын, ортақ болашақ пен келешек үшін күресуге ниетті болуы керек. Егемендіктің әр жылы, еңселі істермен ауыл тұрғындарын қуантып келеді.

Әр жылда ауыл ілгері басып, дамудың даңғыл жолына түсті. Әр жылдың өз тарихы, сол жолда тер төккен азаматтар мен ауыл тұрғындарының еңбектері өлшеусіз. Сол кезеңдерді жылдар жылнамасымен айтсам, 1992 жылы «Өлі жебемей, тірі байымас» деген қазағымыздың мақалына сай, тарих қойнауында қалған елдің дамуына үлес қосқан, елеулі әулие атала­рымызды ұмытпау мақсатында Онды ауылының күнбатыс бетінен «Құрманалы ата» мешіті салынған. 1995 жылы бұрынғы Бекі селолық клубының ғимараты ыңғайландырылып, салынған 50 орындық Бекі бастауыш мектебінде ауыл балалары білім алуда. Сонымен қатар, 2001 жылы Бекі елді мекеніне «ОКИОК» компаниясының демеушілігімен халыққа қа­жетті дүние су таситын көлік алынып берілген.

От жағудың машақатынан айырып, та­биғи көгілдір отынның игілігін көрген ауыл тұрғындарының әлі күнге дейін айтар алғысы шексіз, ел басшыларының еңбегінің нәтижесінде 2004 жылы ауыл түгелдей газбен қамтылды. Елімізде ерекше назарға алынған мемлекеттік саясаттың бірі – қазақстандықтарды сапалы ауыз сумен қамтамасыз ету болса, «Ақ бұлақ» бағдарламасы аясында бүгінде ауыл толықтай таза ауыз сумен қамтылған.

Осы ауылда туып­-өсіп, жұмыс барысымен жыраққа кеткен ауыл тұрғындары мен алыстағы студенттер ауылға әр келген сайын оң өзгеріс­ терге қуанып жатады. Туған жерім деп аңсап келгенде алдынан құшағын айқара ашатын, сәні келіскен, көшелері көз тартар ауылдың келбеті келісіп тұрғанға не жетсін. Ауылға 2014 жылы 8 млн. 784 мың тенгенің ауылішілік тротуар салу жұмыстары жүргізілді. Мектепке, жұмысқа қатынайтын ауыл тұр­ғындары қыстың қары мен күздің жаңбырына малтықпай, діттеген орындарына жеткендері үшін жа­салған жұмысқа халық дән риза, сол кездегі осындай игі істерге мұрындық болған аға буын өкіл­деріне алғысын әлі күнге дейін айтып отырады.

Онды ауылының өсіп-­өркен­деуі мұнымен тоқтап қалған жоқ, әр жыл жақсы жаңалығымен келіп отырған. Олай дейтінім, 2009 жылы салынған ауылішілік 2 ша­қырым асфальт жол, «Ай-­Ана» кешені, Орталық парктің шарбағы, Ә.Кекілбайұлы  атындағы парк, «Қызыл там» қорымы шарбақ­тарының жаңартылуы, көшелердің жарықтануы бәрі­-бәрі тұрғындарға жасалған жақсы жағдай­дың көрінісі.

Білім беру саласына келсек, мен басшы болып келгенге дейін де бұл ауылдың білім ордасының аты жақсы нәтижемен танылып жүрді. Мысалы 2015 жылы облыс бойынша орта білім беретін мектептер арасынан үздік шығып 17 млн теңгенің сертификатын жеңіп алды, мұғалімдердің біліктіліктері мен тәжірибелері арқасында әр жылда «Алтын белгі» иегерлерін шығарып отыр, шығара береміз деген  сенімдемін. Ауылдағы 50 орындық «Құлыншақ» балабақшасы да сәбилердің шат күлкісінен айырылған емес.

Ауылда кәсіпкерлік те біршама дамыды деуге негіз бар. Бүгінде 32 шаруа қожалығы жұ­мыс жасайды. Оның үшеуі бау-­бақша дақыл­-дарын өсірумен, қалғандары мал өсірумен айналысады. Жыл сайын мал басы көбейіп, одан алынатын өнімдері де сапалы болып, пайдаға жарауда. Биыл жеке және шаруа қожалықтардағы жылқы – 2571, түйе – 2018, сиыр – 978, қой-­ешкі – 15581 боп мал басын құрап отыр. Онды ауылында 8 азық­-түлік дүкені халыққа қызмет көрсетеді. Қазір кәсіп ашамын деушілерге мемлекет тарапынан беріліп жатырған мүмкіндік көп, оны біздің ауыл азаматтары да ұтымды пайдалануда. Осындай қарқынмен жоғары деңгейде дамып келе жатқан ауылға мен де өз үлесімді қосып, елмен етене араласа жүріп, халықтың мұң­мұқтажына құлақ асып, олардың жағдайын жасау, егеменді еліміздің барлық игіліктерін көрсету, толық­қанды өмір сүруін ұйымдастыру халықтың қызметшісі ретіндегі міндетім деп есептеймін. Ауыл халқының тұрмысы жайлы, қазаны майлы болуы үшін қазір барлық мүмкіндік бар. Тек соны ұтымды пайдалана білу керек.

А. РАХМЕТОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.