«WORLDSKILLS» чемпионаты - Бейнеуде

Жақында Бейнеу политехникалық колледжінің ұйымдастыруымен колледж базасында ең алғаш рет студенттер арасында «WORLDSKILLS BEYNEU POLYTECHNIC COLLEGE» атты коллеждішілік чемпионат өткізілді. Чемпионаттың негізгі мақсаты - студенттердің мамандыққа қызығушылығын арттырып, бәсекеге қабілетті маман қалыптастыру, шығармашылыққа баулу, жұмысшы мамандықтарының мәртебесін арттыру мен қатар шеберлік дағдыларын дамыту, сондай-ақ студенттерді әлемдік нарық сұранысына бейімдеу және «WORLDSKILLS BEYNEU POLYTECHNIC COLLEGE» атты колледжішілік чемпионатының жеңімпаздарын анықтау. Осы орайда Бейнеу политехникалық колледждінің жетістіктеріне қысқаша тоқталып өтсек, бұл оқу орны ІТ саласы бойынша көрсеткіші жоғары ең үздік колледждердің бірі болып саналады. Өткен оқу жылында колледждегі студенттердің бірі - Еркебұлан Сұлтанғалиев Ресейде өткен «WORLDSKILLSRUSSION» чемпионатында 3-ші орын қола медалға ие болып, Абу- Даби қаласында өтетін әлемдік додаға жолдама алды. Абу-Даби қаласында 77 мемлекет қатысқан үміткерлер арасынан 24-ші орынға тұрақтап, колледж абыройын асқақтатты. Колледжішілік өткен  байқауға  Маңғыстау облыстық білім басқармасының техникалық және кәсіптік білім беру бөлімінің басшысы Жания Сармурзина және облыстық техникалық және кәсіптік білім беру оқу-әдістемелік  кабинеті директорының  орынбасары Кабира Джантекеева, техникалық және кәсіптік білім беру ұйымдарының өкілдері, әлеуметтік әріптестер мен мектеп оқушылары  қатысты. Мекеме директоры Нұрбол Бурин алғашқы құттықтау сөз сөйлеп, қатысушыларға сәттілік тіледі. Одан әрі облыстық білім басқармасының техникалық және кәсіптік білім беру бөлімінің басшысы Ж.Сармурзина чемпионатта бақ сынап жатқан студенттерге «наурыз айында облыстық деңгейде өтетін байқауда топ жарып, биік белесті бағындыра беріңдер» деген ақжарма лебізін білдірді. Чемпионатқа  төрт  мамандықтан он үш құзыреттілік бойынша,  атап айтар болсақ:  ІТ саласы: «Веб дизайн», «ІТ желісін жүйелі басқару», «Графикалық дизайн», «Инженерлік графика САD», «Протиптеу», «Бизнеске  арналған ІТ- бағдарламалық қамтамасыз ету», «Ұялы робототехника» «Компьютерлік  ойындар мен мультимедиялық қосымшаларды дамыту» құзыреттіліктері облыстық деңгейдегі чемпионат; Теміржол саласы бойынша: «Сигналдау, орталықтандыру, блоктау және автоматика жабдықтарын жөндеу, қызмет көрсету»; Автомеханик саласы бойынша: «Жеңіл автомобильге қызмет көрсету, жөндеу» құзыреттілігі және  Тамақтандыруды ұйымдастыру саласы бойынша: «Наубайшы ісі», «Аспаздық ісі», «Қазақтың ұлттық тағамы» құзыреттіліктері бойынша 69 студент қатысып, бақтарын сынады. Сонымен қатар шара аясында колледж ұжымының арнайы мамандары әзірлеген «Жеңіл автокөліктің жарықтандыру және дабыл беру жүйесінің тәжірибелік стенд-тренажерінің» презентациясы болып, макеттер көрмесі таныстырылды. Байқау нәтижесі бойынша жеңімпаздарға сертификаттар табысталып, жүлдегерлер облыстық деңгейде өтетін өңірлік чемпионатқа жолдама алды.

   Үміт ҚАЗДАЕВА