Жаңаөзендегі 5548 әскери бөлімде Отан қорғаушылар күні аталып өтті

7 мамыр Отан қорғаушылар күні қарсаңында Жаңаөзендегі 5548 әскери бөлімінде мерекелік іс-шара өтті. Шарада қалалық ішкі істер бөлімі, қорғаныс істері бөлімі, 5548 әскери бөлімі және қала мектептерінің оқушыларынан құралған «Жас ұлан» командаларының сап түзеген сарбаздары жауынгерлік дағды мен кәсіби шеберліктерін көрсетіп, әскери техникалар, қару-жарақтар көптің назарына ұсынылды. Тәуелсіздігіміз бен тұтастығымызды, тыныштығымыз бен бейбіт тірлігімізді қас қақпай күзетіп, халыққа қорған болған ұлттық әскердің айбынын асқақтатар мерекеге қала басшылығы мен қорғаныс саласының қызметкерлері, ауған соғысы ардагерлері, мектеп оқушылары және жергілікті БАҚ өкілдері қатысты. Мерекелік шара мектеп оқушыларының «Жас ұлан» слетімен басталды. Жаңаөзен қалалық білім бөліміне қарасты 5 мектептің жас тәртіп сақшылары саптық, қару-жарақ жинау, қарулау, ату секілді әскери қарым-қабілеттерін көрсетуден сайысты.

Аманқос Еділов, Ауған соғысы ардагері:

- Бүгінгі Отан қорғаушылардың мерекесіне орай ұйымдастырылып отырған «Жас ұлан» слеті секілді әскери шаралардың жас ұрпаққа патриоттық тәлім-тәрбие беруде маңызы зор дер едім. Отан қорғаушылар күні біз үшін ерекше мейрамдардың қатарынан. Өздеріңізге мәлім, биыл Жаңаөзен қаласына да 50 жыл толып отыр. Сондай-ақ, алда Қастерлі Жеңіс күні келе жатыр. Барлығы да құтты болсын! Халқымыздың береке мен бірлігі мәңгілік болсын.

Ұландар слетінен кейін №5548 әскери бөлімінің әскери кинолог маманы «Детектив» атты қызметтік ит арқылы арнайы жасырылған есірткі өнімін іздеп тауып, жануардың сезгіштік қасиетімен көпшілікті таңқалдырды.

Ербол Қыдырғалиұлы, 5548 әскери бөлімінің әскери кинолог маманы:

- 5548 әскери бөлімінде 2014 жылдан бері қызмет атқарудамын. «Ұлттық ұлан» бас қолбасшысының 2 қыркүйектегі 2015 жылғы №336 бұйрығына сәйкес Жаңаөзен қаласында 2016 жылдан бастап есірткі іздеуге арналған арнайы әскери кинология штаты ашылды. Міне, сол кезден бастап аталған бөлімнің мамандары есірткіге қарсы күрес жұмыстарын атқарудамыз. 2016 жылдан күні бүгінге дейін Жаңаөзен қаласында осы қызметтік иттердің арқасында есірткі ісі бойынша 7 қылмыстық іс ашылды. Иттер арнайы методикамен оқытылады. Осы жылдың басында АҚШ инструкторлары Алматы қаласындағы 6654 әскери бөлімінде қызметтік иттер мен кинолог мамандарға 1 айлық арнайы курс өткізген болатын. Алдарыңызда тұрған «Детектив» сол жерде «Өте жақсы» деген баға алды. Қазір 3 жастан асты. Ағылшын эспаньоласы тұқымынан, бұлардың иісшілдік қасиеті ерекше жоғары болып саналады. Жалпы бөлімде 7 қызметтік итіміз бар. 6-уы неміс овчаркасы, ал біреуі осы ағылшын эспаньоласы.

Салтанатты шараның екінші бөлігі әскери бөлімнің акт залындағы мерекелік концертпен жалғасты. Алғашқы құттықтау сөздерін қала әкімінің орынбасары Сәнім Танаева мен «Нұр Отан» партиясының Жаңаөзен қалалық филиалы төрағасының бірінші орынбасары Ғалым Байжанов сөйлеп, Жаңаөзен қаласында қоғамдық қауіпсіздікті қамтамасыз етуге қосқан үлесі үшін қала әкімінің алғыс хатымен бірқатар әскери қызметкерлерді марапаттады.

«Жас ұлан» слеті сайысының қорытындысы шығарылып, нәтижесінде 2 орынды № 4 орта мектеп, 1 орынды №1 орта мектеп командалары иеленді. Қалалық «Жас ұлан» байқауында саптық тәсілдер мен қозғалыстарды жоғары деңгейде көрсеткені үшін №6 орта мектеп командасы бас жүлдеге лайық деп танылып, қала әкімінің дипломымен марапатталды. Барлық командаларға алғыс хаттармен қатар сыйлықтар табысталды.

Мерекелік шарада «Мұнайшы» мәдениет үйінің өнер ұжымдарымен қатар, әскери қызметкерлер де өнер көрсетті. Концерт 5548 әскери бөлімінің қызметкері Марат Оразалиевтің орындауындағы «Көк Тудың желбірегені» әнімен аяқталды.

Айжан НАСЫРОВА

[gallery td_select_gallery_slide="slide" ids="53560,53559,53558,53557"]