Ақтаулық оқушы Президенттік олимпиадада жеңімпаз атанды
[ 2017 ] 22 қараша, 08:56 | Жастар беті
Ақтау қаласындағы Назарбаев Зияткерлік мектебінің 11-сынып оқушысы Жәңгір Махмутов 7-10 қараша аралығында өткен Х Президенттік олимпиададан алтын медаль иеленді. Сайыста республикадан келген ең үздік 160 оқушы жаратылыстану-математика бағыты бойынша өз бақтарын сынады, - деп хабарлады Ақтау қаласы химия-биология бағытындағы Назарбаев Зияткерлік мектебінің баспасөз қызметі.
Олимпиада үш кезеңде өтті - бірінші кезеңге Зияткерлік мектептерден 500-ден астам оқушы қатысты. Екінші кезең республиканың барлық өңірлерінде бір мезгілде онлайн режимінде өткізілді. Сондай-ақ бұл кезеңде эссе жазды. Ал үшінші кезең Теміртау қаласында өтті.
Зияткерлер байқауына академик Мұхтарбай Өтелбаев бастаған елімізің белді университетттерінің ұстаздары төрелік етті.
- Олимпиаданың екі күнінде химия, биология, математика, физика пәндері бойынша тапсырмалар берілді. Жарыста жеңуім мені үзбей дайындаған мұғалімдердің арқасы. Бұл жеңіс солардың жеңісі деп білемін, - дейді Жәңгір Махмутов.
Айта кетейік, математика, физика, химия және биология пәндері бойынша өтетін президенттік олимпиада талантты жастарды анықтауға және қолдауға бағытталған. Шара ҚР Тұңғыш Президенті күніне орай ұйымдастырылды.
Ақтаудағы Назарбаев Зияткерлік мектебінің баспасөз қызметінің хабарлауынша, қазір Ж. Махмутов 11-сынып оқушысы Н. Мараловпен бірігіп «Hello Tourist» жобасын жасауда. Команда Астанада өткен Ұлттық инновациялық технологиялар Олимпиадасына қатысып, жобаларын ұсынып та көрді.
- «Hello Tourist» жобасы - бұл еліміздің көрікті жерлерін туристерге таныстырып қана қоймайды. Сол жерге баратын көліктердің, аймақта бар тамақтану орындары, ұйықтайтын жерлер туралы ақпарат, байланыс нөмірлері көрсетілген тегін мобильді қосымша және сайттан тұрады, - дейді Нұрдаулет Маралов.
Республика бойынша байқауға 200-ден астам адам қатысуға ниет білдірген. Тек соның 55-і ғана іріктеп алынып, түрлі сынақтардан өтті. Мәреге тек 10 оқушы ғана жетіп Астанада өз жобаларын қорғады. Нәтижесінде Нұрдаулет Маралов пен Жәңгір Махмутов «ШАГ» компьютерлік академиясында бір жыл тегін оқуға сертификат жеңіп алды.
1118
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
