Маңғыстаулық жастар ісінің мамандары оқытудың үшінші күні жеке бренд қалыптастыру бойынша білім толықтарды, - деп хабарлайды mangystaumedia.kz сайты.
"Aktownx" шығармашылық бірлестігінің жетекшісі Нұрсұлтан Мұрзабек жастар қызметкерінің қоғамда өзін-өзі ұстауы, әлеуметтік медиа арқылы өзін және жастар ісі саласын көрсетудің мүмкіндіктерін тілге тиек етті. Сонымен қатар жастар ресурстық орталығының ақпараттық жұмысы туралы сөз қозғады.
Ал Нұрлыбай Наурызбаев жастар қызметкерлерінің кәсіби стандарты мен біліктілік талаптарын түсіндірді. Тренинг соңында жастар "Өзін-өзі бағалау" ойыны бойынша жастар жобаларын іске асырудағы қателіктері мен жетістіктерін бағалады.
"Жастар қызметкерлері әрқашан позитивті және өзгеге позитив сыйлай білетін жан. Сол себепті де тренинг көңілді өтті. Жаңадан келген мамандар бар, құлшынысы жоғары. "Қайда келдік, не жасауымыз керек?" деген сұрақтарға жауап алып, алға мақсат қоя білді. Талқылау кезінде түйгенім, жаңадан келген мамандар өзінің әлсіз тұстарын танып, оны әрі қарай дамыту бағытында әңгіме өрбітті. Мұның өзі - қуантарлық жайт", - деді спикер Нұрлыбай Наурызбаев.
Үш күндік тренинг қатысушыларды командалық ынтымақтастыққа, ұйымшылдыққа баулыды. Сондай-ақ жастар ісінің қағидаттарын білу, әлеуметтік желі арқылы өз жұмысын көрсету, мақсатты аудиториямен тиімді жұмысты ұйымдастыру бойынша кәсіби біліктілігін жетілдірді.
Семинар-тренинг соңында қатысушылар арнайы сертификатпен марапатталды.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
