Облыстық онкологиялық диспансердің анестезиология, реанимация және интенсивті терапия бөлімінің меңгерушісі Талғат Аманжолов бейтаныс адамдардан күніне ондаған алғыс алатынын, тіпті, оны көшеде танып жататынын айтты, - деп хабарлайды mangystaumedia.kz.
Дәрігердің танымалдылығы Астанадан Ақтауға ұшып бара жатқан Әзербайжан азаматын құтқарудан кейін артқан. Бұл оқиға биыл маусым айының соңында болған. Түнгі рейс және ұшақ турбуленттілікке тап болған. Сол сәтте стюардесса динамик арқылы жолаушылардан бортта дәрігердің бар-жоғын сұраған. Сәті түсіп, сол рейсте облыстық онкологиялық диспансердің анестезиология, реанимация және интенсивті терапия бөлімінің меңгерушісі Талғат Аманжолов болған.
«Мен жақындаған кезде комаға дейінгі күйде жатқан әйелді көрдім. Оның беті көгілдір және бозарған. Мен жолаушылардан орындарын босатуын сұрап, оны көлденең күйде жатқызып, қысымын өлшедім. Қан қысымы 60-тан 40-қа дейінгі көрсеткішті көрсетті. Жүрек тоқтап қалу қаупі жоғары болды. Стюардессалар оттегін берді, бірақ бірінші баллонда оттегі жоқ, ауыстырып беруді өтіндім, екінші баллонды әкелді, бірақ ол жақта да оттегі әлсіз. Дегенмен, жеткілікті болды. Содан кейін медициналық көмек ұсынып, атропин мен адреналин тауып, ине салдым. Тамыр соғысы мен қан қысымы тұрақтанды, әйел менімен сөйлесе бастады. Әйел ес-түссіз жатқанда, менен шұғыл қону қажет пе деп сұрады. Бірақ ол керек емес еді. Ақтауға қонғанша мен әйелдің қасында болдым. Қонған соң жедел жәрдемге тапсырып, облыстық ауруханаға жеткізілді», — дейді дәрігер.
Белгілі болғандай, әйелде брадикардиямен гипертония болған, мұндай кезде жүректің тоқтап қалу қаупі жоғары. Әрбір сау ағза ауыр турбуленттілік жағдайларына төтеп бере алмайды. Дәрігердің уақытылы көрсеткен көмегі болмаса, әйел Ақтауға тірі жетпес еді.
«Егер мен оны аман алып қалмасам, лицензиямнан айырылуым немесе авиакомпания мені сотқа беруі мүмкін еді. Бірақ бұл мені тоқтатпады, себебі мен - дәрігермін, дәрігерлер күн сайын адамдардың өмірін сақтап қалады», - деп толықтырды дәрігер.
Талғат Аманжоловтың өзі Қарағандыдан келіп, Ақтауда жұмыс істеп жатыр. Мамандығы бойынша жалпы тәжірибелік дәрігер, сонымен қатар реаниматолог-анестезиолог мамандығын бітірген. Медицинаға Қарағандыдағы атақты хирург ағасының ізімен келген. Борттағы оқиғадан кейін дәрігерге әлеуметтік желілер мен жеке хабарламалар арқылы жүздеген алғыс жазыла бастаған. Дәрігер көшеде де танитынын және үнемі алғыс айтатынын айтады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
