Оңтүстік Қаратұрын кен орнындағы өрт қыркүйекте сөнуі мүмкін

Маңғыстау облысындағы «Оңтүстік Қаратұрын» кен орнындағы өрт қыркүйекте сөнуі мүмкін. «Бозашы мұнай» компаниясы 9 маусымнан бері жанып жатқан отқа қатысты осындай болжам жасап отыр, - деп хабарлайды mangystaumedia.kz ҚазАқпаратқа сілтеме жасап.

Компания газ фонтанын жоюға 300 миллион теңгеден астам қаржы жұмсаған. Төтенше жағдайға байланысты шығын көбеюі мүмкін. Мамандар мердігер мекеме қажетті құжаттардың жоқтығынан өрт ошағындағы көлбеу ұңғымаларды бұрғылай алмай отырғанын айтады.

«Техникалық тұрғыдан бәрі дайын. Кеше өнеркәсіптік қауіпсіздік инспекторлары, экология департаменті мамандарының қатысуымен іске қосу комиссиясы өтті. Өнеркәсіптік қауіпсіздік мамандары бізден көбірек бұрғылау ерітіндісін дайындауды сұрады. Бұл бұрғылау үшін қажет және қосымша құжаттар пакетін де ұсынды. Кейбір қағаздар дайын емес. Бұрғылау компаниясының мамандары, біздің мердігерлер құжаттарды толығымен дайындап тапсыруы керек», - деді «Бозашы мұнай» ЖШС бас директорының стратегиялық даму жөніндегі орынбасары Данияр Дүйсембаев.

Еске сала кетейік, өрт «Оңтүстік Қаратұрын» мұнай-газ кен орнында 9 маусым сағат 3.25-те ұңғыманы бұрғылау жұмыстары кезінде, №303 ұңғымадағы бұрғылау құралы көтеріліп кетіп, жер астынан газ-су қоспасы атқылауы себебінен шыққан. Бір адам зардап шекті.

Кәсіби әскерилендірілген авариялық-құтқару қызметтерінің республикалық орталық штабының бөлімшесі жасақтаған линия бойынша 13 маусымда 302 текше метр ерітінді төгілді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.