Ақтауда қаланың 60 жылдығына орай алғаш рет қала әкімдігінің ұйымдастыруымен «Aktau Mobilography Fest» фестивалі өтті, деп хабарлайды mangystaumedia.kz сайты қала әкімдігінің баспасөз қызметіне сілтеме жасап.
Фестивальға 300-ге жуық адам бейнематериал ұсынған. Байқау шарты бойынша қатысушылар белгіленген үш бағыттың біреуіне видео түсіруі қажет. Атап айтқанда Ақтаудың талантты жастары туралы, қаланың келісті келбеті және Маңғыстаудың көрікті жерлерін түсіру бағыты бойынша сынға түсті. Байқауға қатысқан 300-ге жуық адамның ішінен 30 қатысушының жұмысы ерекше бағаланып, арнайы марапаттар табыстады.
Фестивальға қатысушыларды марапаттау іс-шарасы облыстық филармонияның өнерпаздары орындауындағы «Балбырауын» күйімен ашылды. Концертте халықтық ұжым «Настроение» би ансамблі «Ерке» биін биледі. Сонымен қатар кеште еліміздің танымал әншілері өнер көрсетті. Атап айтқанда Dake, Артур Дәулетияров ән шырқады. Іс-шарада Ақтау қаласы әкімінің орынбасары Нұртас Сали сөз сөйлеп, фестиваль қатысушыларын қала мерейтойымен құттықтады.
-Құрметті Ақтау қаласының тұрғындары, қонақтары және фестиваль қатысушылары! Баршаңызды қаланың 60 жылдығымен құттықтаймын! Ақтауда алғаш рет ұйымдастырылып отырған мобилография фестивалінің басты мақсаты - өңірдің туристік брендін қалыптастыру және жас мобилографтарды қолдау. Соңғы жылдары мықты қарқынмен дамып келе жатқан мобилография саласы еліміздің өркендеп дамуына, халықтың әл-ауқатының өсуіне септігін тигізері сөзсіз. Осындай фестивальдар қала көлемінде алдағы уақытта өткізілетін болады, - деді қала әкімінің орынбасары Нұртас Сали.
Фестиваль қорытындысы бойынша үздік отыздыққа кірген тоғыз мобилограф дипломдармен марапатталды. Ал Қыран Талапбектің мобилография курсын сегіз қатысушы ұтып алса, үш қатысушы «mobilography box» жеңіп алды. Ал «mobilography box max-қа» алты мобилограф ие болды.
-Бұл фестивальдің ерекшелігі - жас санатына қарамай, мобилографтың түсірген видеосын бағалау. Байқауға қатысқан ең жас мобилографтың жасы тоғызда. Бұл мобилография саласы жастардың идеясын жүзеге асырудың керемет құралы екендігін дәлелдей түседі. Осы ретте фестивальға қатысқан барша мобилографтарға алғыс айтамын. Ақтау қаласының тұрғындары мен қонақтарын қаланың 60 жылдығымен құттықтаймын!, - деді мобилограф Қыран Талапбек.
Жүлделі орындарға ие болған жастардың бейнематериалдары LED экранда көрсетілді. ІІІ орын иеленген Мырза Нұрахмет «Apple watch» жеңіп алды. ІІ орынды Бекболат Жұмабаев иеленіп, ол «IPhone 13 pro» ұтып алды. І орынға Азамат Ғалымжан ие болып, «IPhone 14 pro» иегері атанды. Ал бас жүлдені және «IPhone 14 pro max-ты» Дархан Қуанәлі еншіледі. Оның мобилография саласында екі жылға жуық тәжірибесі бар. Жеңімпаз байқауға жақсы дайындалғанын айтып, ұйымдастырушыларға алғысын жеткізді.
-Жасаған бейнематериалым сюжет бойынша шетелге оқуға кеткен баланың еліне оралып, ауылда Маңғыстаудың шұбатын ішкен сәтінен басталады. Кесені көтергеннен кейін, видеода бірден «Адай» күйімен өңіріміздің керемет табиғаты көрініс табады. Соңын Маңғыстаудың мақтанышы, жазушы Әбіш Кекілбаевтың қанатты сөзімен аяқтадым. Бұл фестивальға қатты дайындалдым. Үздік үштікке кіретін шығармын деген бір үміт болды. Бірақ бас жүлдеге ие боламын деп ойламадым. Қатты қуаныштымын. Осы фестиваль ұйымдастырушыларына ерекше алғысымды білдіремін, - деді фестиваль жеңімпазы Дархан Қуанәлі.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
