Маңғыстауда «Арайлы Атамекенім» челленджі басталды

Маңғыстауда 1 наурыз - Алғыс айту күніне орай «Арайлы Атамекенім» челленджі өтіп жатыр. Челлендж 28 ақпаннан 3 наурызға дейін жалғасады, деп хабарлайды mangystaumedia.kz сайты Қоғамдық коммуникация орталығына сілтеме жасап.

Маңғыстау облысы Ішкі саясат басқармасының басшысы Батырхан Кенжеғалиұлының айтуынша, челлендждің басты мақсаты – ата-бабаларымызға, ата-аналарымызға, ардагерлерімізге, денсаулық сақтау қызметкерлері мен құтқарушыларға, өрт сөндірушілерге, мұғалімдерге, тәрбиешілер мен еріктілерге алғыс айту.

- Челлендж барлық маңғыстаулық тұрғындарға арналады. Алғыс айту күніне орай бірінші кезекте дәрігерлерге, полиция қызметкерлеріне, өрт сөндірушілерге, кезекшілікте елдің тыныштығы мен қауіпсіздігін күзететіндердің барлығына алғыс айтқым келеді, - деді Батырхан Кенжеғалиұлы.

Сондай-ақ, күні кеше аймақ басшысы Нұрлан Ноғаевтың қатысуымен өткен дүниежүзілік үкіметтік емес ұйымдар күніне орай ұйымдастырылған шарада МОАА ЗТБ президенті Жібек Ахметова да аталған челленджі қолдайтынын жеткізді.

- Алғыс айту күніне орай бастау алып жатқан «Арайлы Атамекенім» атты челленджін қолдап Нұрлан Асқарұлы, Сізге ҮЕҰ-ға көрсеткен қолдауыңыз бен көмегіңіз үшін барша ҮЕҰ атынан шын жүректен алғыс айтамын! Сонымен қатар, ата-анама, жақындарыма, достарыма, уақытпен санаспай әлеуметтік мәселелердің шешілуіне ықпал етіп жүрген ҮЕҰ жетекшілеріне алғысымды білдіремін!, - деді Жібек Ахметова.

Сонымен қатар, ол сөз соңында челленджді ҮЕҰ басшыларына жолдады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.