Алматы қаласының тұрғыны Мажтай Жаханшах 2023 жылдың 27 мамыр күні Ақтаудағы 17 шағын аудан, 79-үйден сағат 10:00 шамасында белгісіз бағытқа шығып кеткен. Жоғалған азамат 1 маусым күні сағат 10:45-те Ақтау қаласы мен Маңғыстау ауданының аралығындағы сайдан табылды, деп хабарлайды mangystaumedia.kz.
Қазіргі уақытта жоғалған азаматтың жағдайы жақсы, медицина қызметкерлеріне жүгінбеген.
«Іздестіру-құтқару жұмыстарына Маңғыстау облысының Төтенше жағдайлар департаментінен 25 жеке құрам, 3 бірлік техника, 2 кинологиялық есеп тобы, Полиция департаментінен және жергілікті атқарушы орган қызметкерлерінің құрамында 15 адамнан тұратын іздеу тобының күштері мен құралдары және 6 бірлік техника мен Маңғыстау облысының волонтерлерінен 70 адам, 5 техника жұмылдырылды», - делінген ТЖД хабарламасында.
Сондай-ақ, ТЖД мамандары саяхаттайтын аймағыңыздың картасын зерттеу маңызды екенін ескертеді.
«Саяхат жасау үшін адамдармен кеңесіп, олардан ең қолайлы маршруттар бойынша ұсыныс алу керек. Қозғалыс бағыты бар таңбалауды, рельефтің сипатын, қиындықтарды, қауіптерді, су көздерін, қажет болған жағдайда маршруттан шығу мүмкіндігін мұқият зерттеңіз. Сіз қайда бара жатқаныңыз, қозғалыс бағыты және болжамды қайту уақыты, сондай-ақ сіз жақсы білетін кем дегенде екі адамға байланыс уақыты туралы ақпарат қалдыруыңыз керек. Қозғалыс бағытын өзгертпеңіз, өйткені жоспарланған уақытта байланысқа шықпаған жағдайда Сізді сол жерден іздейді. Осы тармақты орындауға байыпты қараңыз, өйткені төтенше жағдай туындаған жағдайда көмек Сізге қаншалықты тез келетініне байланысты», - дейді ТЖД мамандары.
Төтенше жағдай туындаған жағдайда құтқару қызметінің тәулік бойы байланыста болатын «112» бірыңғай нөміріне немесе «101» нөміріне қоңырау шалыңыз.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
