Маңғыстауда жекеменшік мектептер саны артты

Маңғыстау облысының Мұнайлы ауданында биылдың өзінде 2 мектеп пайдалануға беріледі. Былтыр мұнда 4 білім мекемесі салынған еді. Жекеменшік мектептер есебінен 3 ауысымда оқыту мәселесін шешу жоспарланған.

Мәселен, Басқұдық ауылындағы №9 мемлекеттік мектеп 1200 орындық болса да, онда 3700 бала оқиды. Ауданда осындай жағдайдағы тағы 5 мектеп бар. Енді жекеменшік мектептерге иек артуға тура келеді, дейді мамандар.

1200 орындық жеке мектептің құрылысы жартылай бітті. Келер оқу жылында пайдалануға берілуі тиіс. Сол кезде осы елді-мекендегі 3 ауысымда оқыту тоқтайды. Ал Атамекен ауылында былтыр 2 жекеменшік мектеп пайдалануға берілген. Биыл тағы біреуі ашылмақ. Ол үшін қазір бір кәсіпкер тойхана ғимаратын қайта жөндеп, білім беретін мекемеге бейімдейд.

"Біз бір ауысымда 500 бала оқыта аламыз. Ол дегенің 2 ауысымда 1000 бала оқиды. Жазға дейін құрылыс жұмыстарын бітіріп, жазда оқушы қабылдап бастаймыз. Жеке меншік мектептер Қызылтөбе мен Шерқала ауылында да бой көтермек. Ал, алдағы 3 жылда ауданда "Жайлы мектеп" жобасы аясында 6 білім беру ұйымын салу жоспарланып отыр",- дейді кәсіпкер Азат Жолбай.

Мұнайлы аудандық білім бөлімінің басшысы Батырбек Демократұлының айтуынша, былтыр ауданда үш ауысымда оқытылатын 6 мектеп бар еді. Қазір 5 мектеп болып отыр. "Жайлы мектеп" жобасымен және жекеменшік секторларда салынып жатқан жобалармен қоса есептегенде 3 жыл ішінде 3 ауысымдық мектептерді жоюға мүмкіндік бар.

Жалпы облыста 3 ауысыммен оқитын 15 мектеп бар. 9 мыңнан астам оқушыға орын жетпейді. Сондықтан 2025 жылға дейін өңірде 24 мектеп салу көзделіп отыр.

Ақторғын Өтесбай

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.