Маңғыстауда бес ай ішінде 161 адам бас бостандығынан айырылды

Бүгін «Маңғыстау облыстық сотының алқа төрағаларының 2024 жылдың 5 айындағы жұмысының қорытындысы» тақырыбында брифинг өтті, деп хабарлайды mangystaumedia.kz Маңғыстау облыстық сотының баспасөз қызметіне сілтеме жасап.

БАҚ өкілдерімен кездесуге Маңғыстау облыстық сотының қылмыстық істер жөніндегі сот алқасының төрағасы Б.Елемесов, азаматтық істер жөніндегі сот алқасының төрағасының м.а. Ғ.Бастаубаев және әкімшілік істер жөніндегі сот алқасының төрағасы И.Сматов қатысты.

Брифингте Б.Елемесов сот билігінің алдына қойылған тапсырмалардың жүзеге асуына тоқталып, 2024 жылдың 5 айындағы атқарылған жұмыстармен таныстырды.

«Есепті кезеңде 621 тұлғаға қатысты 540 қылмыстық іс аяқталған (2023 жылы – 629 тұлғаға қатысты 545 қылмыстық іс қаралған), яғни 5 іске азайған. Сондай-ақ, өңірде 4 тұлғаға қатысты ақтау үкімі шығарылған (Ақтау қалалық сотында – 1, Маңғыстау облысының қылмыстық істер жөніндегі мамандандырылған ауданаралық сотында - 1, Маңғыстау облысының кәмелетке толмағандардың істері жөніндегі мамандандырылған ауданаралық сотында -2 )», - деді Б.Елемесов.

2024 жылдың 5 айында онша ауыр емес, ауырлығы орташа, ауыр және аса ауыр қылмыстар бойынша сотталғандар саны - 351 болса, оның ішінде бас бостандығынан айырылғандар саны – 161.

2024 жылдың 5 айында 5653 тұлғаға қатысты 5653 әкімшілік құқық бұзушылық туралы істер аяқталған, өткен жылмен салыстырғанда әкімшілік құқық бұзушылық туралы істер 1094-ке өскен.

Одан әрі Маңғыстау облыстық сотының азаматтық істер жөніндегі сот алқасының төрағасы м.а. Ғ. Бастаубаев өңір соттарының азаматтық істер бойынша атқарылған жұмыстарын қорытындылап, есепті кезеңде 8655 (77,2%) азаматтық істер қаралып аяқталғанын (өткен кезеңде 6231 (67,3%)), яғни 2424-ке өскенін жеткізді.

Сондай-ақ, алқа төрағасы дауды соттан тыс реттеу және сотқа дейінгі баламалы институттарды тиімді қолдану, талап қоюды қабылдау кезеңінде мейлінше татуласу рәсімдерінің мүмкіндіктерін пайдалану өз кезегінде аяқталған істер көрсеткішінің төмендеуіне әкелетінін айтып, есепті кезеңде татуласу рәсімдері бойынша 400 (2023ж.- 463) іс медиация тәртібімен 872 (2023ж. - 408) іс бітімгершілікке және 4 (2023ж.- 2) іс партисипативтік келісімге келу арқылы қаралғанын атап өтті.

Брифингте Маңғыстау облысының мамандандырылған ауданаралық әкімшілік сотының төрағасы И.Сматов есепті мерзімде Маңғыстау облысының соттарына барлығы 507 әкімшілік талап қою түскенін (өткен кезеңде 417) соның ішінде (МАӘС – 502, жалпы соттарға–5), былтырғы жылдың есепті кезеңімен салыстырғанда әкімшілік талап қоюлардың 18% өскенін, оның ішінде, өңірде сот орындаушылардың іс-әрекеттеріне (іс-әрекетсіздігіне) дау айту, салық, жер даулар бойынша талап қою басым екенін жеткізді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.