Туа біткен ақаумен дүниеге келген сәбилердің өмірін сақтап қалуда Маңғыстау облыстық көпбейінді балалар ауруханасының жоғары санатты хирург дәрігері Құрман Қайранов отаға шағын инвазивті, инновациялық арнайы әдістер мен күрделі медициналық технологияларды пайдаланады, деп хабарлайды mangystaumedia.kz облыстық денсаулық сақтау басқармасының баспасөз қызметіне сілтеме жасап.
Ел ықыласына бөленіп, мыңдаған ата-ананың алғысын алып жүрген Құрман Айғалиұлы өз қызметіне қаныққан майталман маман. Әр сәбидің жағдайын жеке дара талқылап, шешім қабылдайды. Отаға шағын инвазивті, инновациялық арнайы әдістер мен күрделі медициналық технологияларды пайдаланады.
2023 жылдың өзінде туа біткен ақаумен дүниеге келген 5 сәбиге күрделі ота жасап, жағдайларын қалыпқа келтірді.
-Дәрігер болу қиын да қызықты сала. Адам алдымен өз мамандығына берік және адал болуы тиіс. Бала денсаулығы өте үлкен жауапкершілікті талап етеді. Сондықтан әрбір отаны жасау, бұл командалық жұмыс. Хирург, анестезиолог, неонатолог, реаниматолог, орта және кіші медицина қызметкерлерінің тығыз әрекет етуінің арқасында операциялардың сәтті шығуына мүмкіндік мол,-деді дәрігер-хирург Құрман Қайранов.
Маңғыстау облысындағы перинаталдық орталығында жылына 9000 мыңға жуық нәресте дүниеге келеді. 300-ге жуық сәбидің дамуында туа біткен ақаулар анықталады. Жиі кездесетіні жүрек, жүйке түтігі, ішек пен асқазанның туа біткен ақаулары т.б. Көп жағдайда сәбилерге жедел хирургиялық көмек пен күрделі оталар алғашқы тәуліктерде жасалуы тиіс жағдайлар кездеседі.
Айта кетейік, түрлі деңгейдегі оталар міндетті әлеуметтік медициналық сақтандыру (МӘМС) есебінен жасалды. Сәбидің әрі қарай оңалып кетуі нәрестелерді жетілдірудің 2-ші сатысы және нәрестелер реанимациясы бөліміндегі неонатолог пен реаниматолог мамандардың кәсібилігіне, ерекше күтіміне тікелей байланысты болмақ.
Антына адал, жауапкершілігі мол, парасат пайымы жетерлік, байсалды мінезді, білікті де білімді, балалар хирургиясының қыры мен сырын терең меңгерген, халықтың алғыс сауабын арқалаған алтын қолды дәрігер Құрман Қайрановтың ұрпақ денсаулығын қорғауда еңбегі ұшан-теңіз екені сөзсіз.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
