Айналаға адал, алғысқа лайық жандар

Мемлекет басшысы Қасым-Жомарт Кемелұлы «Жаңа жағдайдағы Қазақстан: іс-қимыл кезеңі» атты Қазақстан халқына Жолдауында: - Қоршаған ортаны қорғау және экологиялық даму – еліміз үшін алдыңғы кезекте тұрған мәселе. Бүкіл өркениетті әлем жұртшылығы осы мәселемен айналысуда. Бізге де мұндай жаппай үрдістен шет қалуға болмайды, - деп атап көрсеткен болатын.

Көше тазалығы мәселесі қашан да маңызын жойған емес. «Айта, айта Алтайды, Жамал апам қартайды» дегендей, газетімізде аталмыш тақырып төңірегінде тазалық мәселесі аз қозғалып жүрмесе де, айналамыздың тазалығына «адал» жандардың еңбегіне алғыс айтып жүрміз бе?!

Естеріңізде болса, тазалық жұмыстарымен айналысуға рұқсат беретін тендер ағымдағы жылдың басында Форт-Шевченко қаласының тазалығына ЖШС «Тазалық- С» мердігер жеңімпаз болып танылған еді. Көшеміздің көркін арттырып, қажетсіз қоқыстардан арылуымызға үлкен күш салып жүрген қоғамдық қызметкерлердің еңбегін ешкім жоққа шығармауы тиіс. Түпқараған ауданының орталығы Форт-Шевченко қаласы бойынша қызметкерлер саны – екі ауысымда 20-дан асады. Олардың күнделікті жұмысын көзіммен көріп, мән-жайына қанығып келген біз күннің суығына қарамай, тыным көрмейтін еңбектеріне бас иіп, алғыс айтуды жөн санадық.

Негізі жұмыс уақыты таңғы 9:00-де басталып, (арасында үзіліс уақыты бар) кешкі 18:30-ға дейін жалғасады екен. Алайда, «тазалық сақшылары» таңмен таласа тұрып, жұмыс басынан табылды. Тізілген контейнерлердің ішіндегі қоқыстан сыртында шашылғаны көп. Қаңғырған иттер, қараусыз сиырлар әр түйінділерді аударып-төңкеріп, қарқылдаған қарғалар аузына «несібесін» тыққыштап жүр. Тұрмыстық қалдықтар ғана салуға арналған контейнерлерге құрылыс қалдықтары да (үлкен ағаш, шифр, терезелер) аяусыз тасталған.

Ауламнан ғана ары дейтін тұрғындар бұл жандардың қоқысты қолымен теріп, иісін қолқаларына қаптыратындарын біледі ме екен?

Ендеше бүгінгі Алғыс айту мерекесінде неге бұл жандарға да ақ жарма тілекті арнамасқа деген тұжырыммен «Маңғыстау-Медиа» ұжымы тазалық сақшыларын аталмыш меркемен шын жүректен құттықтайды. Адал еңбек иелеріне денсаулық, бақыт тілейміз!

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.