Ақтауда тұтынушыларға 10 миллион теңгеден астам қаржы қайтарылды

Маңғыстау облысының сауда және тұтынушылардың құқықтарын қорғау департаменті тұтынушыларға 10 миллион теңгеден астам ақшаны қайтарып берді, - деп хабарлайды mangystaumedia.kz сайты.

Өңірдегі бағалы әшекей-бұйымдар сататын кәсіпкерлер «Тұтынушылардың құқықтарын қорғау туралы» заңнаманы сақтамауына байланысты Департаментке бірнеше өтініш келіп түсті. Атап айтқанда, Өскемен қаласының азаматшасы Ақтау қаласының кәсіпкерінен онлайн сауда жасап, алтын сағат сатып алды. Сатып алған сағаты сапасыз болуына байланысты сатушыдан ақша қаражатын қайтарып беруін сұраған. Тұтынушы Заңның 42-4 бабына сәйкес кәсіпкерге өзінің наразылығын ұсынған.

Тұтынушы департамент қызметкерлерінің көмегімен тауарға төленген соманы қайтарып алды.

Департамент басшысы Рауан Мұхаев осы ретте тұтынушылардың құқығын тағы бір ескертті.

Заңның 7 бабына сәйкес тұтынушылардың:
1) тауарларды (орындалатын жұмысты және көрсетілетін қызметті) иеленуге еркін шарт жасасуға;
2) тұтынушылардың құқықтарын қорғау саласындағы ағартуға және тұтынушының өз құқықтары мен заңды мүдделерін қорғау мәселелерінде құқықтық сауаттылығын арттыруға;
3) тауар (жұмыс, көрсетілетін қызмет) туралы, сондай-ақ сатушы (дайындаушы, орындаушы) туралы ақпарат алуға;
4) қауіпсіз тауарды (жұмысты, көрсетілетін қызметті) сатып алуға;
5) тауарды (жұмысты, көрсетілетін қызметті) еркін таңдауға;
6) тауардың (жұмыстың, көрсетілетін қызметтің) тиісті сапасына;
7) тиісті де, тиісті емес те сападағы тауарды айырбастап алуға немесе қайтарып беруге;
8) тауардың (жұмыстың, көрсетілетін қызметтің) кемшіліктері салдарынан өздерінің өміріне, денсаулығына және (немесе) мүлкіне келтірілген залалды (зиянды) толық көлемде өтетуге;
9) сатушыдан (дайындаушыдан, орындаушыдан) тауарды сатып алу (жұмысты орындау, қызметті көрсету) фактісін растайтын құжатты немесе тауарды сатып алу (жұмысты орындау, қызметті көрсету) кезінде жасалған шартты алуға;
10) ұтыс түрінде берілген (орындалған, көрсетілген) тауардың (жұмыстың, көрсетілетін қызметтің) сапасы бойынша ойындардың бастамашысына (ұйымдастырушысына) кінә қоюға;
11) тұтынушылардың қоғамдық бірлестіктерін құруға;
12) моральдық зиянды өтетуге;
13) құқықтары мен заңды мүдделерін қорғауға;
14) осы Заңда және Қазақстан Республикасының өзге де заңдарында көзделген өзге де құқықтарды жүзеге асыруға құқығы бар.

Егер Сіздің тұтынушы ретінде құқығыңыз бұзылса, көрсетілген байланыс номерлеріне хабарласа аласыздар: 8(7292)43-14-34, 43-01-17. Мекенжайымыз: Ақтау қаласы, 9 шағын аудан, 23 «А» ғимарат, 215 кеңсе.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.