Ақтауда сүңгуірлер Каспий теңізін қоқыстан тазалады

Ақтауда «Таза Қазақстан» экологиялық акциясы аясында теңіз түбі қоқыстан тазартылды. Су астындағы тазалық жұмыстарына әскери-теңіз күштерінің сүңгуір қызметі жұмылдырылды, - деп хабарлайды mangystaumedia.kz қала әкімдігінің баспасөз қызметіне сілтеме жасап.

Экологиялық акция аясында сүңгуірлер су астында 10-15 метр тереңдікте жатқан қоқысты жианды. Сүңгуірлер су астына қоқыс салатын қапшықтарын ала түсті. Өткен жолы теңіз түбін тазалағанда 10 қап қоқыс шыққан еді, осы жолы 12 қап қоқыс шықты. Акция аясында үш сүңгуір Каспий теңізінің 250 шаршы метр аумағын қоқыстан тазалады. Сүңгуірдің бірі Сайран Әбдікәрімов Қазақстан Республикасы әскери-теңіз күштерінде 9 жылдан астам уақыт қызмет етіп келеді. Әскерилер тазалық акцияларын әрқашан қолдауға дайын екендігін жеткізді.

-Теңіз түбінде көбіне пластмасса, пакет, пластик құты, темір-терсек жатады. Бүгін экологиялық акция аясында сүңгуірлер болып теңіз тазалығына өз үлесімізді қосып жатырмыз. Тұрғындарды теңіздегі тазалықты сақтап, жағалауға демалысқа келгенде қоқыс-қалдықтарды суға тастамауды сұраймыз, - деді 2901 әскери бөлімінің әскери-теңіз күштері сүңгуір қызметінің бастығы Сайран Әбдікәрімов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.